HANDELSNUUS •••
•••••••
WESSELSBRON VERHOUDINGSBESTUURDER
Om Tait vir jou produsente te hê
FLIP TAIT SE NAAM SÊ ALLES - HY HET TYD OFTEWEL IN SY GEVAL , TAIT , VIR SY PRODUSENTE .
AUBREY KRUGER
Vir die produsente van
Wesselsbron , die area waarop ons ook in die uitgawe fokus , is Flip welbekend . Dis omdat Flip vanjaar 50 jaar by hierdie maatskappy vier !
En in al die jare loop kommunikasie met sy produsente soos ’ n goue draad deur sy sukses hier . Flip het ’ n halfeeu gelede , in 1967 , as klerk by Senwes in Bloemfontein begin werk . Hy gee ’ n heel ander betekenis daaraan om direk na skool vir ’ n maatskappy te begin werk . Hy het letterlik Vrydag , 8 Desember 1967 met skool klaargemaak en daardie volgende Maandag , 11 Desember het hy hier begin werk . Twee jaar later , in 1969 , is hy tot assistent takbestuurder by Verkeerdevlei bevorder , waarna hy ook dié pos by Klerksdorp tak en by Koppies beklee het . In sy sesde jaar by Senwes word hy takbestuurder by Lagerskraal , gevolg deur Lindley , Brandfort , terug na Lagerskraal en daarna Theunissen . Sedert 2003 is hy by Wesselsbron gesetel , eers as takbestuurder en daarna as verhoudingsbestuurder .
Hy vervul sedert 2005 die rol hier . Hy het tyd vir sy produsente en as hy nie het nie , maak die Zastron-gebore man tyd . Hy het baie wye kennis en vertel dat benewens kommunikasie met sy produsente , kommunikasie met sy personeel en verskaffers ewe belangrik is . Flip volg ‘ n oorkoepelende benadering waar hy kyk of sy klant tevrede is , sy behoeftes bepaal en reël ook finansiering vir hulle . “ Dis hoekom hulle my vertrou . En as hulle vertroue het , kommunikeer hulle meer .”
Hy gaan besoek produsente ook op hul plase . Anders sien hulle hom ook wanneer hulle “ sommer dorp toe kom .” Maar op Saterdae maak hy weer spesiaal tyd , dan gaan kyk hy self na sy produsente se plase en maak notas oor wat op hulle lande aangaan . Wanneer hulle hom dan besoek sal hy vir hulle sê dat hy weet wat op hulle plase gebeur en dat hy klaar ’ n aanbeveling of twee op die tafel het . “ Dan antwoord hulle my gewoonlik : Hoe weet jy dit ?
Dan sê ek vir hulle ek stel werklik belang in hul besigheid .”
Hy werk ook lekker met al sy personeel hier . Hy en takbestuurder Johnny Bezuidenhout vorm ’ n gedugte span . “ Ek werk lekker saam met Johnny . Hy steun my met bemarking en ons kommunikeer ook reg met mekaar . Baie keer as Johnny weg is van die tak af , kan ek pa staan vir dinge , want die een hand was mos die ander .” Hy sal op 17 Maart vanjaar ook 44 jaar van getroude lewe met sy vrou Yvonne vier . Hulle het twee seuns , wat ook in die landboubedryf is . Sy oudste seun , ook Flip , is in die kunsmisbedryf en is by Vetrivier Boeredienste werksaam en Chris is takbestuurder by Suidwes in Bothaville .
Op 31 Januarie vanjaar het hy 68 geword en van aftree wil Flip niks weet nie . “ Wat sal ek dan doen ? My probleem is ek kan nie stilsit nie .” Dié dat hy voel dat hy nog ten minste drie jaar oor het waarin hy sy kennis kan deel – “ Mens koop mos nie ondervinding nie , of hoe ?”
SENWES Scenario • FEB / MRT 2017 33