•••
VROUE D I N AM I K A
DS. JACKIE VAN ZYL
‘N BRIEFIE VIR DIE MANNE
I
IN DIE VORIGE
UITGAWE VAN
SCENARIO HET EK
‘N BRIEFIE GESKRYF
VIR DIE DAMES
OOR HUL LIEFDE
VIR HUL MANS. SO
VANDAG IS DIT DIE
MANNE SE BEURT.
n 1 Korintiërs 7:2 sê
Paulus dat elke man sy
eie vrou moet hê en elke
vrou haar eie man. Dus, as
Paulus dan in Efesiërs 5:25
die volgende sê “Mans, julle
moet julle vrouens liefhê soos
Christus die kerk liefgehad
en sy lewe daarvoor afgelê
het”, dan bedoel hy dat elke
man sy eie vrou SO lief
moet hê. En die pragtige
woorde wat Paulus in hierdie
vers gebruik, getuig van ‘n
onvoorwaardelike liefde soos
min!
Manne, as jy een maal
belowe het om jou vrou
lief te hê, dan geld dit
net vir haar en vir geen
ander vrou nie! Ja, ek weet
ons dames beleef soms ‘n
“onvoorspelbare broosheid”
wat die lewe vir elke man
minder maklik maak, maar
jy het haar gekies en trou
aan haar beloof met haar
onvoorspelbare broosheid en
al. Of jou vrou die lekkerste
skaapnek kook en of jy elke
dag brood eet, of jou vrou
redelik of onredelik is, jy
het haar gekies en daarom
moet jy onvoorwaardelike
liefde aan haar bewys.
Onvoorwaardelike liefde
is nie altyd maklik nie, maar
weet julle hoeveel beteken
‘n drukkie op die regte tyd,
of ‘n kompliment as sy
moeite gedoen het? Selfs ‘n
blommetjie of ‘n koppie tee
na ‘n lang dag, ‘n gunsie as sy
moeg is of net alleentyd saam
met haar, kan vir vroulief
die wêreld beteken. Doen
iets spesiaal vir haar, bederf
haar, sien haar seer raak,
luister aandagtig wanneer
sy met jou praat, stel haar
behoeftes bo jou eie, koester
haar hart en bo dit alles: wees
verskriklik lief vir haar.