INNLEDNING
Eit breitt, godt og inkluderande tilbod
skal vi som fotballfamilie levere. Hjå
oss skal det vere mogeleg for alle å ta
del. Samstundes skal vi også tilby ein
arena for utvikling av dei beste. Dette
blir vi utfordra på ofte, spesielt viss
våre flaggskip på klubb- og landslagsnivå ikkje leverer som vi forventar.
Denne utfordringa skal vi vere glade
for, fordi vi alltid vil ha noko å gå på.
Vi kan alltid utvikle oss og bli betre.
Difor er det kjekt at vi har fått fram
nokre nye heltar, som Ada, Caroline,
Omar, Mats og Martin. Saman med
desse skal vi vere konstant svoltne
på utvikling og ta nye steg.
Vi deltok diverre ikkje med vårt lag
i VM i Brasil i fjor sumar. Men vi
var likevel til stades gjennom vårt
prosjekt, Handshake for Peace.
FIFA brukte prosjektet tydeleg i
sin kommunikasjon rundt kampane,
for å skape den gode atmosfæren.
Og rapportane i ettertid var at det
gav resultat, både på og rundt bana.
Prosjektet vart første gang lansert i
samband med vårt eige forbundsting
i 2012. Det har vore ei historisk reise,
som på langt nær er komen til endestasjonen. Idretten og fotballen sitt
Fair play- og forsoningsarbeid i ei uroleg
verd vil berre bli meir etterspurd.
La bodskapen frå Handshake for
Peace, våre verdiar og respekt vere
det grunnleggjande i tingsalen også.
Slik kan vi løfte dei gode debattane
rundt framtidige strukturar, spelarutvikling, internasjonale utfordringar,
rammevilkår og ny handlingsplan.
La også dette tinget sette eit godt
fotavtrykk i utviklinga av norsk fotball.
Til slutt vil eg takke vår største
ressurs; alle de som kvar dag legg
ned mykje arbeid for å realisere vår
visjon om «Fotballglede, muligheiter
og utfordringar for alle» basert på
våre fremste verdiar: Tryggleik,
glede, respekt og likeverd. Utan baner
har vi ingen arena for å fremje våre
verdiar. Det er dei frivillige i norsk
fotball som - saman med vår generalsponsor Norsk Tipping – har gitt
oss flotte anlegg over heile landet.
I 2015 vil kunstgrasbane nummer
1000 i full størrelse bli opna.
De har alle grunn til å vere stolte!
Mange takk også til våre partnarar
i klubb, krets og forbund. Saman
utviklar vi Noregs største og beste
ungdomsorganisasjon endå nokre
hakk. Vi kan alltid bli betre.
Lukke til med tinget og lukke til
med sesongen 2015.
Yngve Hallén
President i Norges Fotballforbund
NFF ÅRSRAPPORT 2014 9
01