Myndir mánaðarins MM Janúar 2020 Bíóhluti | Page 13

Nú árið er liðið
Tekjuhæst á árinu
Eins og allir vita geta vinsælustu leikararnir á hverjum tíma þénað
dágóðar upphæðir sem eflaust myndu nægja fleirum en þeim fyrir
salti í grautinn. Fjölmiðla- og fjármálafyrirtækið Forbes hefur um
árabil reiknað út tekjur stjarnanna og eru eftirfarandi upplýsingar
frá því fyrirtæki komnar. Þess ber að geta að þetta eru í öllum til-
fellum brúttótölur, þ.e. laun fyrir skatta, gjöld og kostnað, og að
tekjutímabilið hjá Forbes hvað þetta varðar er frá júní til júní.
Rétt eins og síðast er það besti vinur litla mannsins, Dwayne „The
Rock“ Johnson, sem státar af mestu tekjunum en hann þénaði 89,4
milljónir dollara á árinu, eða sem nemur rúmlega ellefu milljörðum
íslenskra króna. Er það nokkur lækkun frá síðasta ári þegar Dwayne
þénaði 124 milljónir dollara, en það voru líka hæstu tekjur sem
nokkur leikari hafði nokkurn tíma þénað á einu ári fyrir leik.
Í öðru sæti er Chris Hemsworth sem þénaði 76,4 milljónir dollara
og hækkaði þar með tekjur sínar á milli ára um 12 milljónir dollara,
Í þriðja sæti er Robert Downey, Jr. með 66 milljónir dollara en hann
var í öðru sæti í fyrra með 81 milljón. Fjórða og fimmta sætið verma
svo indverski leikarinn Akshay Kumar með 65 milljónir og Hong
Kong-meistarinn Jackie Chan með 58 milljónir.
Bradley Cooper kemur glænýr inn á listann frá því í fyrra með 57
millur eins og gulldrengurinn Adam Sandler sem einnig þénaði 57
milljónir dollara og hækkaði því um 20 milljónir dollara á milli ára.
Í áttunda sæti er fyrsta leikkonan á listanum og þar með tekjuhæsta
leikkona heims á síðasta ári, Scarlett Johansson, með 56 milljónir
dollara í tekjur og þar á eftir, eða í níunda sæti listans, er önnur
leikkona, Sofia Vergara, sem þénaði 44,1 milljónir dollara.
Karlarnir taka svo aftur við í sætum 10 til 11 og eru það þeir Chris
Evans með 43,5 milljónir og Paul Rudd með 41 milljón sem verma
þau sæti. Þau Will Smith og Reese Witherspoon eru svo hnífjöfn í
sætum 12–13 með 35 milljónir dollara hvort í tekjur.
Þar með höfum við talið upp tíu tekjuhæstu karlleikarana en af því
að konurnar á topp 13 eru bara þrjár nefnum við til viðbótar þær sjö
sem náðu einnig inn á topp 10-listann yfir tekjuhæstu leikkonurnar.
Þær eru Nicole Kidman með 34 milljónir dollara, Jennifer Aniston
með 28 milljónir, Kaley Cuoco með 25, Elisabeth Moss með 24,
Margot Robbie með 23,5, Charlize Theron með 23 og að lokum
Ellen Pompeo í tíunda sæti með 22 milljónir dollara í tekjur.
Nýstirni ársins – Kona
Það koma auðvitað margar leikkonur til greina sem nýstirni ársins
en þar sem við megum bara velja eina þá völdum við ensku leik-
konuna Florence Pugh af þeirri einföldu ástæðu að við teljum að
hún verði stórstjarna á næstu tveimur til þremur árum. Florence,
sem er fædd 3. janúar 1996 í Oxford, vakti mikla athygli í sinni fyrstu
mynd, The Falling árið 2015, og sló svo í gegn hjá öllum sem sáu
hana í aðalhlutverki myndarinnar Lady Macbeth 2016. Hún lék svo í
myndunum The Commuter, Outlaw King, Malevolent og Midsommar
áður en hún vakti alþjóðlega athygli í aðalhlutverki myndarinnar
Fighting with My Family. Með frammistöðu sinni í hlutverki Amy
March í Little Women er hún nú á góðri leið með að vinna hug og
hjörtu bandarískra áhorfenda og það er engin tilviljun að hún var
valin úr hópi þúsunda ungra leikkvenna til að fara með hlutverk
ofurnjósnarans Yelenu Belovu í væntanlegu stórmyndinni Black
Widow, en Yelena er bæði samstarfs- og besta vinkona Natöshu
Romanovu sem Marvel-aðdáendur þekkja mun betur sem svörtu
ekkjuna og Scarlett Johansson hefur leikið á undanförnum árum.
Og til að vera með allt á hreinu þá er eftirnafn Florence Pugh borið
fram eins og Íslendingur myndi bera fram orðleysuna „pjúf“.
Nýstirni ársins - Karl
Við sláum tvær flugur í einu höggi þegar við útnefnum hinn tólf
ára Roman Griffin Davis sem nýstirni ársins því hann er þá um leið
barnastjarna ársins. Roman, sem verður þrettán ára 5. mars en var
ellefu ára þegar hann fór með aðalhlutverkið í myndinni Jojo Rabbit,
er leikari af guðs náð og á ekki langt að sækja áhugann því móðir
hans, Camille Griffin, er handritahöfundur og leikstjóri og faðir hans,
Ben Davis, er einn virtasti kvikmyndatökumaður Breta. Og við hér á
Myndum mánaðarins erum sannarlega ekki þau einu sem valið hafa
Roman sem nýstirni ársins því það hafa mörg gagnrýnendasamtök
líka gert og segir það sína sögu að hann sé á meðal þeirra sem nú
eru tilnefndir til Golden Globe-verðlauna fyrir besta leik ársins.
Myndir mánaðarins
13