Myndir mánaðarins MM Desember 2018 Bíóhluti | Page 8

Bíófréttir – Væntanlegt
Leikstjórinn James Cameron tilkynnti um miðjan nóvember að fyrir
utan nokkur atriði sem þyrfti að fínpússa með áhættuleikurum væri
tökum lokið á hinum fjórum Avatar-framhaldsmyndum sem hann
og samstarfsfólk hans hefur verið að gera á undanförnum árum
og frumsýna á í desember 2020, 2021, 2024 og 2025. James, sem á
m.a. að baki Terminator-myndirnar og tvær vinsælustu kvikmyndir
sögunnar, þ.e. fyrstu Avatar-myndina 2009 og svo Titanic frá árinu
1997, segir að þessar nýju Avatar-myndir verði glæný upplifun fyrir
kvikmyndahúsagesti og að ástæðan fyrir þeim langa tíma sem tekið
hefur að kvikmynda þær felist að stóru leyti í nýrri tegund af svokallaðri
„motion capture“-tækni, ekki síst sem snýr að slíkri kvikmyndatöku í
vatni en þessi tækni var hreinlega fundin upp um leið og myndin var
gerð. Lofar James áhorfendum að með þessari nýju tækni muni þeir
um leið upplifa nýja tegund af þrívídd sem sé hrein bylting. Við getum
ekki annað en beðið spennt í þau tvö ár sem eru þangað til.
Þetta er enginn annar en sjálfur John Wick sem þarna er kominn á
hestbak í þriðju myndinni um kappann sem frumsýna á um miðjan maí
ef áætlanir ganga eftir og er sem fyrr eftir leikstjórann Chad Stahelski
eftir handriti Dereks Kolstad. Sem fyrr er það Keanu Reeves sem leikur
John og verður spennandi að sjá hvað hann tekur sér fyrir hendur en
eins og þeir muna sem sáu mynd númer tvö lauk henni með frábæru
atriði þar sem John fékk að vita að eftir eina klukkustund myndu allir
leigumorðingjar heimsins snúa sér að því verkefni að drepa hann.
„Segðu þeim, segðu þeim öllum, að ég muni drepa þá“ voru lokaorð
hans í myndinni áður en hann hljóp út í buskann og má því reikna með
að þriðja myndin hefjist ekki mikið síðar en klukkustund eftir það.
8
Myndir mánaðarins
Þarna sjáum við leikstjórana Kevin Kölsch og Dennis Widmyer ræða við
þá Jason Clarke og John Lithgow við tökur á myndinni Pet Sematery
sem frumsýna á í apríl og er eins og flestir vita byggð á einni af bókum
hrollvekjumeistarans Stephens King. Sagan, sem kom út árið 1983
og hlaut fjölmörg bókmenntaverðlaun á sínum tíma, er í stuttu máli
um Creed-hjónin Louis og Rachel sem flytja ásamt tveimur börnum
sínum í hús sem stendur í útjaðri bæjarins Ludlow þar sem Louis, sem
er læknir, hefur fengið starf á sjúkrahúsi. Fljótlega eftir komuna á nýja
staðinn uppgötva þau dýrakirkjugarð í nágrenninu og það á auðvitað
eftir að koma í ljós að honum fylgja þau hrollvekjandi álög að dýrin sem
eru grafin þar ganga aftur. Þetta er önnur bíómyndin sem er gerð eftir
þessari sögu en sú fyrri var frumsýnd 1989 og skaut mörgum áhorf-
endum skelk í bringu. Það mun þessi nýja mynd væntanlega líka gera.
Hér sjáum við hvar verið er að taka upp atriði í myndinni The Goldfinch
eftir leikstjórann John Crowley sem síðast sendi frá sér hina rómuðu
mynd Brooklyn, en hún hlaut BAFTA-verðlaunin sem besta breska
mynd ársins 2015 og var tilnefnd til þrennra Óskarsverðlauna. Sem fyrr
ræðst John ekki á garðinn þar sem hann er lægstur því The Goldfinch
er byggð á samnefndri bók bandaríska rithöfundarins Donnu Tartt sem
m.a. hlaut Pulitzer-verðlaunin sem besta skáldsaga ársins 2013. Myndin
er um ungan dreng sem kemst lífs af úr sprengingu þar sem móðir hans
lætur lífið og í aðalhlutverkum eru Nicole Kidman, Oakes Fegley, Ansel
Elgort, Luke Wilson, Sarah Paulson og Ashleigh Cummings. Myndin
verður frumsýnd í október á næsta ári og eru sumir þegar farnir að spá
því að hún verði ein af þeim myndum sem keppa munu um helstu kvik-
myndaverðlaunin þegar kvikmyndaárið 2019 verður gert upp.