Myndir mánaðarins MM Desember 2018 Bíóhluti | Page 16
Væntanlegt í janúar
Þann 18. janúar verða þrjár myndir frumsýndar,
þar á meðal nýjasta mynd M. Nights Shyamalan,
Glass, en eftir henni bíða sjálfsagt margir, svo
umtöluð sem hún hefur verið allt frá því að hafist
var handa við gerð hennar. Í Glass koma saman
þrír karakterar úr fyrri myndum Shyamalans, þ.e.
þeir David Dunn og Elijah Price (herra Glass) úr
myndinni Unbreakable frá árinu 2000 og svo
Kevin Wendell Crumb úr myndinni Split en hann
er í raun 24 persónur í einum og sama líkamanum.
Með hlutverk þessara þriggja karaktera fara sem
fyrr þeir Bruce Willis, Samuel L. Jackson og James
McAvoy sem í upphafi myndarinnar virðast allir samankomnir á einhvers
konar meðferðarstofnun þar sem gera á tilraunir til að „lækna“ þá af
þeim hugmyndum að þeir séu eitthvað örðuvísi en aðrir og búi jafnvel
yfir einhvers konar ofurkröftum. Annars er best að vera ekkert að spá í
söguna á þessu stigi þar sem upplýsingar um hana eru afar takmakaðar
að öðru leyti en því sem sést í magnaðri stiklunni. Hún er þó langt frá því
að upplýsa um raunverulegan söguþráð þótt vissulega virðist hún sýna
nokkur af lykilatriðum myndarinnar. Með önnur stór hlutverk í Glass fara
m.a. Anya Taylor-Joy, Sarah Paulson, Luke Kirby og Spencer T. Clark.
Önnur mynd sem einnig verður frumsýnd 18.
janúar er Ben is Back eftir leikstjórann og hand-
ritshöfundinn Peter Hedges sem á m.a. að baki
myndirnar Pieces of April, Dan in Real Life og The
Odd Life of Timothy Green auk þess sem hann
skrifaði handritin að myndunum About a Boy
og What’s Eating Gilbert Grape sem var jafnframt
byggð á skáldsögu hans. Ben is Back segir frá
ungum manni, Ben Burns, sem var bæði djúpt
sokkinn og hætt kominn vegna eiturlyfjafíknar
og glæpa sem hann framdi vegna þeirra áður en
honum tókst að rétta sig af á meðferðarstofnun.
Þegar myndin hefst er hann að koma heim á ný þar sem m.a. móðir hans
tekur á móti honum og þótt hún sé fegin að það sé í lagi með son sinn
er hún jafnframt dauðhrædd um að hann falli á ný. Á þann ótta slær ekki
þegar hún kemst að því að einn af fyrrverandi dópfélögum Bens telur
hann skulda sér peninga sem hann verði að greiða, sama hvað. Myndin
þykir gríðarlega áhrifarík, raunsæ og góð í alla staði og þá sérstaklega
leikur þeirra Juliu Roberts og Lucasar Hedges í aðalhlutverkunum.
Þykja þau bæði líkleg til að verða tilnefnd til einhverra ef ekki allra stóru
verðlaunanna fyrir vikið á næsta ári. Þess má geta að Lucas, sem lék m.a.
í myndunum Manchester by the Sea, Lady Bird, Three Billboards Outside
Ebbing, Missouri og Boy Erased, er sonur leikstjóra myndarinnar og þykir
allt eins líklegur til að hljóta tilnefningar til margra verðlauna fyrir leik
sinn í síðastnefndu myndinni, þ.e. Boy Erased, sem er væntanleg í bíó í
mars næstkomandi. Um hana fjöllum við betur þegar að því kemur.
Þriðja myndin sem frumsýna á 18. janúar er
svo teiknimyndin Ótrúleg saga um risastóra
peru sem er gerð eftir samnefndri barnabók
danska rithöfundarins og teiknarans Jakobs
Martin Strid en hún kom út árið 2012 á íslensku í
snilldarþýðingu Jóns St. Kristjánssonar. Varð hún
um leið önnur bókin eftir Jakob sem gefin hefur
verið út á Íslandi en sú fyrri var Í búðinni hans
Mústafa í þýðingu Friðriks H. Ólafssonar.
Ótrúleg saga um risastóra peru er í raun ótrúleg
saga og svo viðburðarík að það hálfa væri nóg. Í
stuttu máli segir hún frá vinunum Sebastian sem
er fíll og kisustelpunni Mithco sem dag einn veiða flöskuskeyti í höfninni
frá týndum bæjarstjóra bæjarins sem þau búa í. Fyrir gráglettni örlaga og
tilviljana fer svo að þau leggja ásamt prófessor Glúkos upp í langferð yfir
úthafið á risastórri peru sem er útbúin eins og bátur. Á leiðinni lenda þau
í vondum veðrum, hitta sjóræningja, drauga, drekaskip og margt fleira
áður en þau finna loksins eyjuna þar sem bæjarstjórinn er. Myndin þykir
bráðskemmtileg fyrir krakka en þeir fullorðnu munu líka hafa gaman af
henni því í henni er að finna stórskemmtilega ádeilu sem aðeins þeir
munu skilja, án þess að það skemmi fyrir þeim sem yngri eru.
16
Myndir mánaðarins
The Mule nefnist nýjasta mynd Clints Eastwood
og verður hún ásamt tveimur öðrum myndum
frumsýnd 25. janúar. Myndin, sem Clint leikur
jafnframt aðalhlutverkið í, segir frá níræðum
manni, Earl Stone, sem fellur í þá freistni að flytja
þrjú kíló af kókaíni frá Mexíkó til Bandaríkjanna
fyrir mexíkóskan eiturlyfjahring. Sagan er byggð
á sönnum atburðum og sækir efniviðinn í grein
Sams Dolnick sem heitir The Sinaloa Cartel’s 90-
Year Old Drug Mule og birtist í The New York Times
fyrir nokkrum árum. Handritið er hins vegar eftir
Nick Schenk sem skrifaði einnig hina góðu mynd
The Judge og myndina Gran Torino sem Clint leikstýrði einmitt 2008 með
sjálfum sér í aðalhlutverki. Þá héldu margir að Clint hefði leikið í sinni
síðustu mynd, enda þótti hann gefa það sterklega í skyn með endi þeirrar
myndar þar sem karakter hans dó eftir að hafa fórnað sér fyrir málstaðinn.
Með helsta hlutverk á móti honum í The Mule fer Bradley Cooper og er
þetta í annað sinn sem þeir tveir vinna saman því eins og menn muna lék
Bradley aðalhlutverkið í mynd Clints, American Sniper, sem var frumsýnd
fyrir fjórum árum og gerði það víða mjög gott. Með önnur stór hlutverk
fara svo Taissa Farmiga, Michael Peña, Andy Garcia, Laurence Fishburne,
Dianne Wiest og dóttir Clints, Alison Eastwood.
Mary Queen of Scots eftir Josie Rourke verður
einnig frumsýnd 25. janúar ef áætlanir ganga eftir
en í henni leika þær Saoirse Ronan og Margot
Robbie Mary Stúart Skotadrottningu annars veg-
ar og hins vegar Elísabetu 1. Englandsdrottningu.
Myndin er byggð á bók Johns Guy og segir
frá því þegar Mary Stúart, sem var réttborin
drottning Skota, sneri til Skotlands á ný eftir að
hafa alist upp í Frakklandi frá unga aldri. Margir,
þar á meðal hún sjálf, töldu hana einnig eiga
tilkall til ensku krúnunnar, en því var Elísabet að
sjálfsögðu ekki sammála. Eftir að Mary hafði lent
í vandræðum heima fyrir sem tengdust hjónabandi hennar og James
Hepburn leitaði hún á náðir Elísabetar árið 1567. Þær stöllur voru í raun
ekki óvinir en þar sem Mary hafði gert tilkall til ensku krúnunnar og naut
stuðnings uppreisnarhóps sem studdi þá kröfu þá þorði Elísabet ekki að
styðja hana og í gang fór mikil barátta sem átti eftir að hafa afdrifaríkar
afleiðingar í för með sér til margra ára. Mary Queen of Scots er ein af þeim
myndum sem er spáð góðu gengi á verðlaunahátíðum næsta árs og hafa
fyrstu viðtökur verið afar góðar, en myndin hefur verið sýnd á nokkrum
kvikmyndahátíðum þótt hún fari ekki í almenna dreifingu fyrr en í janúar.
Enn ein myndin sem þykir líklega til afreka á
komandi verðlaunahátíðum er Stan & Ollie eftir
leikstjórann Jon S. Baird (Filth) en hún verður eins
og myndirnar tvær hér fyrir ofan frumsýnd 25.
janúar. Fyrst og fremst þykja þeir John C. Reilly og
Steve Coogan líklegir til að hljóta verðlaun fyrir
túlkun sína á gríntvíeykinu Oliver Hardy og Stan
Laurel sem hér á landi voru á sínum tíma alltaf
kallaðir Steini og Olli, eða Gøg og Gokke sem
var danska heitið. Þykja þeir John og Steve ná að
túlka félagana tvo á nánast fullkominn hátt, bæði
í atriðum þar sem þeir eru að skemmta svo og
utan sviðs. Handritið þykir og frábært en það er skrifað af Jeff Pope sem
hlaut fjölda verðlauna fyrir síðasta bíómyndahandrit sitt, Philomena, þ. á
m. BAFTA-verðlaunin og tilnefningu til Óskarsverðlauna. Myndin gerist
undir lok ferils þeirra Stans og Laurels á sjötta áratug síðustu aldar þegar
þeir koma til heimalandsins Bretlands eftir áralanga vist í Hollywood þar
sem þeir gerðu fjölmargar myndir. Þeir ákveða að fara í sýningarferðalag
um Bretlandseyjar, en það gengur upp og niður, ekki síst vegna þess að á
milli þeirra ríkti ákveðinn ágreiningur vegna gamals atburðar sem aldrei
hafði verið gerður upp auk þess sem Laurel var farinn að tapa heilsu
þegar þarna var komið sögu. Samt sem áður voru þessir menn eins miklir
perluvinir og hægt er að vera og þykir myndin lýsa sambandi þeirra afar
vel auk þess sem þær Shirley Henderson og Nina Arianda þykja alveg
frábærar í hlutverkum eiginkvenna þeirra, Lucille og Idu.