Bíófréttir – Væntanlegt
Tryllarnir gerir það gott
Önnur mynd Jordans Peele á eftir hinni rómuðu Get Out, Us, sló
heldur betur í gegn í kvikmyndahúsum þegar hún var frumsýnd 22.
mars og fór um leið á spjöld kvikmyndasögunnar þegar hún halaði
í kassann meira en 70 milljónir dollara á sinni fyrstu sýningarhelgi í
Bandaríkjunum – og varð um leið önnur hrollvekja sögunnar til að
gera það á eftir Halloween sem sló í gegn síðastliðið haust. Myndin
hefur einnig hlotið mjög góða dóma flestra gagnrýnenda, er með
8,0 í meðaleinkunn frá 53 gagnrýnendum á Metacritic þegar þetta
er skrifað, og þykir nú mjög líkleg til afreka á verðlaunahátíðum
þegar árið verður gert upp, rétt eins og raunin varð með Get Out
sem var einmitt einnig frumsýnd í marsmánuði fyrir tveimur
árum og skilaði að lokum hátt í 260 milljónum dollara í tekjur í
kvikmyndahúsum. Eins og staðan er þegar þetta er skrifað lítur allt
út fyrir að Us eigi eftir að gera enn betur og því er ekki að undra að
fréttamenn séu þegar farnir að spyrja Jordan Peele hvað hann ætli
að bjóða upp á næst. Engin svör liggja fyrir af hans hálfu en hann
hefur samt gefið í skyn að hann langi til að halda áfram á sömu
braut og vonar að þriðja mynd hans komi í bíó eftir tvö ár.
Næsta hrollvekja sem frumsýnd verður er svo Pet Sematary sem
gerð er eftir einni af bókum Stephens King og er kynnt hér aftar í
blaðinu. Þær ánægjulegu fregnir bárust af henni rétt áður en þetta
blað fór í prentun að fyrstu viðbrögð gagnrýnenda sem sáu hana á
South by Southwest-hátíðinni 20. mars séu afar góð. Þannig sagði
t.d. gagnrýnandi IGN, Jim Vejvoda, að þessi kvikmyndaútfærsla
blési nýju lífi í söguna og væri ein besta mynd sem gerð hefur verið
eftir bókum Stephens á meðan James Mottram hjá Total Film lofar
því að aðdáendur Stephens og hrollvekja yfirleitt verði ekki fyrir
neinum vonbrigðum. Þess má geta fyrir þá sem þekkja söguna að
ákveðið var í samráði við Stephen að breyta endi hennar frá því sem
var í bókinni og samnefndri kvikmynd sem gerð var eftir henni árið
1989 þannig að jafnvel gamlir aðdáendur hennar eiga í vændum
alveg nýja fléttu sem ekki hefur sést áður. Á myndinni hér fyrir ofan
eru leikstjórarnir tveir, Kevin Kölsch og Dennis Widmyer, sem hljóta
nú að bíða spenntir eftir að sjá hvort viðtökur almennings verði
jafn góðar og viðtökur gagnrýnendanna sem séð hafa myndina.
6
Myndir mánaðarins
Ramy leikur vonda kallinn
Við sögðum frá því í síðasta blaði að 25. James Bond-myndin
sem nú er í vinnslu og til stendur að frumsýna í apríl 2020, hefði
hlotið heitið Shatterhand. Nýjustu fréttir af henni herma nú
að ákveðið hafi verið að bjóða Bohemian Rhapsody-stjörnunni
Ramy Malek að taka að sér hlutverk aðalandstæðings Bonds í
myndinni. Þegar þetta er skrifað hefur ráðningin ekki verið 100%
staðfest en þegar Ramy sjálfur var spurður út í málið á dögunum
sagðist hann því miður ekki geta látið hafa neitt eftir sér um gang
samningaviðræðna annað en það að það stæði ekki á honum að
þiggja hlutverkið. „Já, auðvitað segði ég já við slíku boði enda
um draumahlutverk að ræða fyrir mig. Mér finnst gaman að leika
vonda kalla.“ Við sjáum hvað setur en búast má við tíðum fréttum
af leikaravali í myndina á næstu vikum í viðbót við fastaleikarana
Daniel Craig, Ralph Fiennes, Naomie Harris og Ben Whishaw enda
eiga tökur myndarinnar að hefjast í apríl.
Ryan Reynolds er Pikachu
Fyrsta leikna (eða hálfleikna) Pokémon-myndin er væntanleg í
kvikmyndahúsin 10. maí og hafa stiklurnar úr henni notið mikilla
vinsælda enda bráðskemmtilegar og bera með sér að von sé
á góðri skemmtun. Myndin byggir að stórum hluta til á hinum
gríðarvinsæla tölvuleik Detective Pikachu sem kom út 2016 og
í aðalhlutverkum mennsku persónanna eru þau Justice Smith,
Kathryn Newton og Ken Watanabe. Pikachu sjálfur fær hins vegar
rödd og leikgleði Ryans Reynold lánaða og er óhætt að fullyrða
eftir að hafa séð stiklurnar (þær eru þrjár, ein löng og tvær stuttar)
að Ryan fari á kostum í talsetningunni. Myndin gerist í veröld þar
sem fólk og Pokémonar búa saman og fjallar um það þegar þeir
Pikachu spæjari og Tim Goodman taka höndum saman í leit að
föður þess síðarnefnda sem hvarf sporlaust. Við segjum betur frá
myndinni í næsta blaði en skorum auðvitað á alla Pokémon- og
Ryan Reynolds-aðdáendur að kíkja á bráðskemmtilegar stiklurnar.