Myndir mánaðarins Júní 2018 tbl. 293 Bíóhluti | Page 8
Bíófréttir – Væntanlegt
Önnur stiklan sem við nefnum hér er frá
Warner Bros og er líka byggð á þekktri
bók en hún er í leikstjórn Andys Serkis,
meistara „motion capture“-tækninnar.
Myndin nefnist Mowgli eftir titilpersón-
unni og er gerð eftir hinum frægu sögum
Rudyards Kipling sem nefnast einu
nafni Jungle Book, eða Skógarlíf eins og
þær eru oftast nefndar á íslensku (hétu
upphaflega Dýrheimar á íslensku) en
þessar sögur komu út í tveimur bindum
árið 1894 eftir að hafa upphaflega birst í
bandarískum tímaritum. Að sögn Andys sjálfs var sú stefna tekin
við gerð myndarinnar að reyna að fanga andrúmsloft sagnanna
eins vel og framast var unnt en þær gerast í Indlandi eins og
flestir vita og segja frá hinum unga Mowgli sem elst upp á meðal
úlfa í frumskóginum og eignast með tímanum marga góða vini
úr dýraríkinu, en líka óvini. Stiklan lítur ákaflega vel út, vægast
sagt, og það er greinilegt að gríðarlegur metnaður liggur að
baki gerðar myndarinnar sem á vonandi eftir að skila sér til fulls
þegar hún verður frumsýnd í október. Þess má til gamans geta að
í einni útgáfu stiklunnar útskýrir Andy Serkis atriðin sem sjást og
hugmyndirnar að baki bæði þeim og sviðsetningu myndarinnar.
Fyrir áhugafólk er mjög fróðlegt að hlusta á frásögn hans.
Sagan á bak við söguna
Bíómyndin Mamma Mia! sló í gegn árið 2008 enda einstaklega
skemmtileg, fyndin og fjörug mynd. Hún var eins og allir vita
byggð í kringum lög og texta hljómsveitarinnar ABBA og skart-
aði frábærum leikhópi sem kom á óvart með söng og dansi.
Þann 18. júlí verður ný Mamma Mia-mynd frumsýnd, Here We
Go Again. Í henni snúa allir helstu leikarar fyrri myndarinnar
aftur auk nýrra en í myndinni er líka farið til baka í tímann og
sagt frá því þegar Donna (Meryl Streep) hitti fyrst hina þrjá
feður Sophie (Amanda Seyfried) og hún varð til. Með hlutverk
Donnu þegar hún var ung fer Lily James en í öðrum hlutverkum
aðalpersónanna þegar þær eru ungar eru tiltölulega óþekktir
leikarar sem eiga það þó sameiginlegt að vera mjög líkir sínu
eldra sjálfi! Cher mætir einnig á svæðið sem amma Amöndu. Við
fjöllum betur um þennan væntanlega stórsmell í næsta blaði.
Stökkið mikla sem Tom Cruise framkvæmdi við tökur á sjöttu Mission
Impossible-myndinni með þeim afleiðingum að hann ökklabrotnaði.
Tvær stiklur hafa verið gefnar út úr sjöttu Mission Impossible-
myndinni, Fallout, sem verður frumsýnd hér á landi 1. ágúst. Þær
eru báðar allsvakalegar enda innihalda þær sirka tvær milljónir
mismunandi áhættuatriða og það fer
ekkert á milli mála að hugmyndin hefur
verið að toppa allt sem áður hefur sést í
þessum myndum hvað slík atriði varðar.
Í stiklunum sést Tom Cruise geysast um
borgir og lönd, loftin blá og fjöll og
firnindi, bæði á tveimur jafnfljótum og
á ýmsum farartækjum, og af atriðunum
að dæma hlýtur hann að deyja a.m.k.
fimm sinnum í myndinni (hann dó bara
einu sinni í síðustu mynd). Fallout á því
áreiðanlega eftir að verða hasarmynd
ársins. Um leikstjórnina sá Christopher McQuarrie sem gerði
einnig síðustu mynd, Rogue Nation, og fyrir utan Ethan Hunt
koma bæði nýir og gamlir kunningjar við sögu sem m.a. þau
Rebecca Ferguson, Simon Pegg, Ving Rhames, Vanessa Kirby,
Henry Cavill, Michelle Monaghan, Angela Bassett, Alec Baldwin
og Wes Bentley leika. Þess má geta að slysið sem Tom Cruise lenti í
og frestaði tökum á myndinni um nokkra mánuði, þ.e. þegar hann
ökklabrotnaði í einu áhættuatriðinu þar sem hann var að stökkva
á milli húsþaka, er notað í myndinni, a.m.k. samkvæmt stiklunum.
8
Myndir mánaðarins
Amanda Seyfried og Meryl Streep leika sem fyrr mæðgurnar
Sophie og Donnu sem nú rifja upp hvernig Sophie varð til.
Þeir Colin Firth, Stellan Skarsgård og Pierce Brosnan mæta
að sjálfsögðu aftur á svæðið sem þeir Harry, Bill og Sam.