Ons parkeer agter die kompleks. Regs van ons is
The Stilt Walkers van kunstenaar Dick Bisset wat
laat loop langs die wingerde. Ons gaan lê op die gras,
plat op ons rûe en neem foto’s.
Gabriëlskloof is ’n spogplaas en huisves ’n restaurant,
fynkoswinkel en wynproe en olyfproe area.
Die perfekte plek vir ’n groot familiebyeenkoms,
soos Ma en Pa se goue bruilof. Ons proe eers wyn.
Foto: Xavier Nagel
Na ’n rukkie se wag, het Bernhard kom wyn skink en
gesels. Ons begin met hul Sauvignon Blanc en gaan voort met Rosebud
(Shiraz/Voignier Rosé), The Blend (Bordeaux versnit) en ’n Shiraz.
Die eksklusiewe reeks is Voignier, Magdalena (Semillon/Sauvignon),
Five Arches (Bordeaux) en die Swartrivier Shiraz. Daar’s ’n MCC oppad.
Ons proe olyfolie – koud-gepers van Coratina, Frantoio en Leccino
olywe en met goue medaljes bekroon in die 2013 Suid Afrikaanse
Olyfolie Toekennings, asook die ABSA 5. ’n Besonderse intense groen
ontploffing wat dadelik verdere eksperimentasie met verskeie tipes brode
en ander substrate in my smulpaap geestesoog oproep. Frans, sjef van
Gabriëlskloof restaurant, gebruik dit vir kook sowel as in slaaisouse,
en sê: “Gaan heerlik saam met ons selfgemaakte dukkah!”
Na proe en koop, vat ons koers restaurant toe. Daar’s ’n paar groot tafels
waar druk gekuier word. Ons sit op die stoep in
die binnehof en kyk na kinders wat baljaar op die
grasperk. ’n Plek vir families, want hier kan Ma en
Pa jolig kuier en steeds ’n wakende oog hou.
Frans Groenewald is meesterkok. Hy en sy vrou
Mariaan is eienaars van die restaurant.
Hul kookfilosofie: gebruik soveel en sover as
moontlik plaaslike produkte. Ons bestel en ek
besluit om ’n draai te maak by die delikatessewinkel. Restaurant en winkel maak hul gebak
self (behalwe die croissants) en gebruik GM-vrye
koring en meel uit die Caledon distrik.