MARLO
#SaraGeheim
Rustige outjie van die Hoorn
Hy was te sien in Boland Moorde en nou weer as Aiden Cloete in die nuwe dramareeks
Sara se Geheim. Maar Marlo Minnaar is glad nie so nors soos van sy karakters nie, hoor!
M
12
arlo Minnaar is iemand
wat holderstebolder in sy
karakters inklim – selfs
ongure karakters speel hy
met absolute oortuiging. Dis dalk dié dat
vreemdelinge dink hy is nors.
“Ja, hulle dink ek is afsydig,” sê die man
wat die rol van Aiden Cloete vertolk in
kykNET se splinternuwe dramareeks Sara
se Geheim en ook tot onlangs in Boland
Moorde te sien was. “Nee man, ek is
’n vriendelike bra.”
Okei-okei, soms gaan die wag voor sy
mond wel vroeg met ete...
“I shoot from the hip, maar sal nooit
mense doelbewus seermaak nie. Tog is
party mense bang vir my; hulle dink dalk
ek is kras.”
kykNET | MEI 2017
Deur Haidee Muller
Min mense weet hy is eintlik ’n diep
denker, vertel dié 27-jarige Oudtshoorn-
kind. “Maar ek neem myself darem nie te
ernstig op nie.”
Gepraat van ernstig, daar ís een slegte
Marlo-eienskap wat moet weg, meen hy.
“Ek vergeet of vergewe nie maklik nie. En
ek kan nogal lank ’n grudge hou, maar ek
werk hard om dit te verander.”
Sy rol as Aiden was omtrent ’n emosio-
nele reis, sê Marlo. Hy moes diep binne
homself gaan krap.
“Aiden is die oudste seun van Maggie
Cloete (Lee-Ann van Rooi). Die storie
gaan oor drie families en hulle geheime.
Aiden, ’n student, word die meeste daar-
deur geraak. Hy word vals beskuldig en
moet sy naam in ere herstel.”
Een van sy eie grootste vrese is om
vals beskuldig te word. “En hier moes ek
nou só iemand speel. Op die ou end soek
Aiden ook maar net sy ma se waardering
en aanvaarding.”
MARLO IS ’N MA-KIND. Dié middel
seun van Maureen en Christopher het
op Oudtshoorn grootgeword, maar is op
Grootfontein in Namibië gebore waar sy
ma se mense steeds woon.
“Ek noem my ma my tjomma. Ons is
baie geheg aan mekaar, nou meer as ooit
tevore.” Pa Christopher is ’n afgetrede
sammajoor en het in die laat jare tagtig
met sy gesin na Oudtshoorn se weermag-
basis getrek.
“Dit was lekker dae, maar hy was streng.
Ons het gekén van ’n sambokhou. My ma
is sagter en dra haar hart op haar mou. Ek
ook. Ek is stil, eintlik ’n loner. Ek huil gou
– dis seker hoekom ek die kunste gekies
het. Soms help die emosie om rolle beter
te kan vertolk.
“Ander se pyn trek ek my ook gou aan.
Ek kan nie mense sien swaarkry nie. Sirië
se oorlog maak my hartseer, die tik-oorlog
in ons gemeenskappe maak my hartseer.
En nou het ons gemeenskappe geword
waar apatie aan die orde van die dag is.
Almal kyk liewer anderpad.”
AS JY WIL HÊ DIE WÊRELD moet
verander, moet jy heel eerste by jouself
begin, dít glo Marlo onomwonde. En
al is sy vriendekring klein, koester hy
hegte vriendskappe.
“Ek sal berge versit vir my geliefdes.
Ek is vrygewig en glo daaraan om te gee
sonder om iets terug te verwag, want só
groei jou eie seëninge.”
Hy woon al agt jaar in die Kaap nadat
hy sy dramastudie by Maties voltooi het.
“As ek nou terugdink, besef ek hoeveel
my ouers vir ons opgeoffer het. Ons was
nie ryk nie, maar as dinge sleg gegaan het,
het ons kinders dit nooit geweet nie.”
Sy sammajoor-pa wou hê hy moes ook
weermag toe, maar Marlo het in gr. 10 al
besef sy hart lê op die planke.
“Natuurlik was my pa nie happy nie,
maar tog het hy ’n plan gemaak sodat my
dramadrome kon waar word. Twee dae
voordat ek op Stellenbosch moes wees, is
hy eers bank toe. Toe hy daar uitstap, het
hy net gesê: “Gaan pak jou goed. Ons ry.”
Nou stroom die pluimpies in vir sy
rol as die rentboy Lucky Marais in Santa
Gamka uit Eben Venter se pen met Jaco
Bouwer as regisseur. Daar is al onder
meer ’n Fiësta vir Beste Solovertoning,
drie Kannas vir Beste Grondverskuiwende
Werk, Beste Regie en Beste Nuutgeskepte
Afrikaanse Produksie. Nou die dag het
’n Fleur du Cap ook bygekom – beste
vertoning in ’n revue, kabaret of eenman-
vertoning. “Santa Gamka is my eerste
produksie wat so suksesvol is.”
Die toekennings staan en blink op
die TV-kas in sy sitkamer, vertel hy half
verleë. “Ek waardeer die erkenning, maar
dit gaan nie daaroor nie. Dis genoeg as jou
vertoning mense raak of as mense hulle
daarmee kan vereenselwig.”
Hy het Eben se boek destyds met sy
laaste geld gekoop – die storie het met
hom gepráát. Hy wou met alle mag Lucky
se storie vertel.
“Elke keer as ek teruggaan Oudtshoorn
toe, besef ek hoe min geleenthede daar vir
Karoo-kinders is.”
‘Op die ou end soek
Aiden ook maar net
sy ma se waardering
en aanvaarding.’
Hy en Lucky het op ’n manier baie met
mekaar gemeen, sê Marlo. “Ek het die
road less travelled geneem, nie geweet of
dit my gaan maak of breek nie, maar ek
wou geleenthede met albei hande aan-
gryp. Hy ook tog.”
Wat sê sy ma, Maureen, oor daai om-
strede tonele?
“Sy weet ek klim in my karakters in en
dis nie werklik ek nie. Sy wou net weet
of dit nou regtig nodig was om my hele
stert vir almal te wys, maar sy het dit baie
geniet. Ek het haar aan die teaterwêreld
voorgestel en sy is nou baie lief daarvoor.”
AS DIE SLUWE TONY in die sepie
7de Laan het hy sake ook deurmekaar
gekrap. “Daai was die eerste keer dat ek só
’n ou gespeel het. Gelukkig het niemand
my agterna op straat kom klap nie. Dis
ons werk om realiteite te wys, en ongeluk-
kig is daar vele Tonys in die wêreld.”
Enige taboes?
“Rassisme en ongeregtigheid maak my
moeilik. Ons is steeds so behep met kleur
en ras. Jy moet respek hê vir jou mede-
mens. Dis só belangrik.”
Hy dink nié hy is die kat se snor nie.
“Onthou wie vir jou daar was toe dinge
swaar was. Ek is geleer dat jy altyd moet
onthou waar jou wortels lê. Daarom wil ek
iets terugploeg in my gemeenskap. Leiding
en raad aan opkomende kunstenaars is
kosbaar. Maar ek is nog besig met my eie
reis; ek is nog nie waar ek moet wees nie.”
Marlo sê hy praat gereeld met God
wanneer hy langs die see gaan stap. “Ek
is onder die sterreteken die Vis gebore en
hou van water. Ek het ’n guardian angel.
Ek het nog altyd sterk, gesond en heel
anderkant uitgekom. Jou ouers se gebede
wat jy nie hoor nie, dra jou deur.”
Vandag koester hy die Karoo meer as
ooit tevore. “Dis my ontvlugting, my kom-
vandaan. Daar is ek net Marlo, ’n rustige
outjie van die Hoorn. Ek haat konflik,
maar moenie op my trap nie...”
Vir meer inligting
gaan na
kyknet.dstv.com/
program/sara-se-
geheim
Marlo en Lee-Ann van Rooi, wat die rol van sy ma, Maggie Cloete, speel, op die stel van Sara se Geheim.
Sarah se Geheim Dinsdae om 20:00 op kykNET, kanaal 144
MEI 2017 | kykNET
13