Esaki ta e kaso di un konsumidó ku a bai un establesimentu, kaminda buskando algun artíkulo pa su kas, a nota un bunita makutu di bamboo ku den su mente tabata nèt loke e tabata buskando pa pone den su baño.
Miéntras konsumidó tabata inspekshonando e makutu, el a ripara ku esaki tabata basha hopi sas. Pero komo un hende ku sa di e material
aki, e konsumidó a disidí ku e ta kumpra e makutu tòg, i e mes lo
drecha esaki. Den mes rosea konsumidó ta pidi e komersiante un deskuento pa kompensá ku e makutu no ta bon bon i ku e lo
mester bai ‘coat” e makutu di nobo, pa e por keda manera e
ta suponé di ta. E komersiante di su banda ta indiká di lo no
duna un deskuento i si konsumidó no kier e makutu, “e laga
esaki para..”. Apesar di e señal kla aki e konsumidó ta disidí ku
e ta kumpra e makutu tòg.
Grandi tabata asombro di e komersiante ku dos siman despues
di e kompra, e konsumidó ta bai e negoshi bek i ta pidi su sèn
bek, ya ku e makutu di bamboo ta defisiente. E artíkulo kumprá
no a resultá loke e la spera i manera e mes a konta fundashon,
“ora un produkto no ta loke bo a spera di dje, e komersiante tin e
obligashon di kambia esaki“.
E komersiante na promé instante a ninga di kambia e artíkulo argumentando ku:
1) konsumidó tabata na altura ku e makutu tabatin algun
defekto (basha sas). E konsumidó a kumpra e artíkulo riba
su propio responsabilidat;
2) e la bisa e konsumidó adelantá ku e no ta obligá di kumpra
e artíkulo;
3) kumprá ta kumprá!
Konsumidó no konforme, i despues di a hasi reklamo serka e komersiante, a buska intermediashon di nos Fundashon pa por resolvé
e kaso aki.
Fundashon pa Konsumidó a aserká e komersiante en kuestion pa splika ku aunke e konsumidó, sabiendo ku e makutu tabata falta algu, tòg a kumpra esaki, e di su banda tin e obligashon di bende artíkulonan òf produktonan den bon estado. Pa lei, si un artíkulo ta defisiente òf no ta funshoná konforme e meta ku e tin, e artíkulo ei no mester ta den rèki òf kaminda hende por kumpra esaki. E komersiante al final a komprondé esaki i a duna konsumidó un tegoedbon.
Kumprá ta kumprá