Ta hopi di nos a yega di eksperensiá por ehèmpel ku despues ku Aqualectra kita koriente, na momentu ku e koriente bini bèk aparatonan elektróniko a daña. Ta hopi ta e kasonan di konsumidónan ku ta haña nan mes konfrontá ku e problema aki.
E hecho ku Aqualectra tin monopolio pa produkshon i suministro di awa i koriente ta krea un responsabilidat grandi pa e kompania aki i ta trese ku n’e ku e kompania mester hasi tur lo kual ta na su alkanse pa e kumpli debidamente ku su klientenan.
Onredelijk bezwarend/ inhustamente inkriminatorio
Pa loke ta trata artíkulo 28 di e Kondishonnan General di Aqualectra nos por remarká lo siguiente. A base di artíkulo 6:237 sub f di nos Kódigo Sivil, klóusulanan den kondishonnan general ku ta libra e kompania òf un terser partido di su obligashon di paga daño i perhuisio, ta sospechá di ta ‘onredelijk bezwarend’ (inhustamente inkriminatorio) pa e konsumidó. Di nos banda, nos lo investigá a base di hurisprudensia si e klóusula aki en bèrdat ta ‘onredelijk bezwarend’ i si esaki ta e kaso, tuma pasonan konkreto pa evitá ku den futuro pa motibu di e klóusula aki konsumidónan wòrdu perhudiká.
Aqualectra tin e obligashon di garantisá e kliente ku e suministro di koriente no ta perhudik’é
Konsumidónan ta paga pa produkshon i suministro di awa i koriente dor di Aqualectra. Komo tal Aqualectra tin e obligashon pa ku e konsumidónan ku produkshon i suministro di awa i koriente ta tuma lugá segun e kontrakt ku Aqualectra a sera ku e konsumidó.
Di nos banda, Fundashon pa Konsumidó su deseo ta pa konhuntamente ku Defensor di Pueblo di Kòrsou, kuminsá na promé lugá na yega na un solushon pa e situashon ferfelu ku e habitantenan di Tera Kòrá ta eksperensiando i na segundo lugá purba trese un solushon konforme lei pa tur e otro kasonan similar na otro partinan di nos dushi isla Kòrsou.