PRÓLOGO
Preis di kuminda ta keda punto pa atendÉ
E edishon di e luna aki nos fundashon kier pone atenshon na adaptashonnan den e sistema di Makutu Básiko ku gobièrnu ta bai introdusí. Pa esaki nos kolaboradó hurídiko, Andrea Geerlof, a entrevistá hefe Interino di Inspekshon Ekonómiko, sr. Ronny Cornelis. I kedando den e esfera di supermerkado i den kolaborashon ku Inspekshon Ekonómiko den e rúbrika di Kompará i kumpra nos ta pone atenshon na un komparashon di preis ku hopi di nos konsumidónan ta reklama tokante di dje. Esta diferenshanan di preis entre produktonan den rèki di un tienda of supermerkado i e preis ku nos ta paga na kaha ora skèn e produkto. Ta bèrdat ku tin hopi diferensha entre preisnan den rèki i na kaha?
Tambe un relato di e akshon ku Fundashon pa Konsumidó, huntu ku Defensor di Pueblo a lansa hasiendo un yamada na konsumidónan ku a sufri daño a konsekuensha di baida di koriente pa asina, si ta nesesario, aserká Aqualectra pa ku e kehonan di konsumidónan ku aparentemente no ta haña e reakshon satisfaktorio serka nos kompania di utilidat.
I den nos sekshonnan di salubridat “Bo Salú” i di informashon “Den chikí” manera nos konsumidónan ya a kustrumbrá lo tin informashon variá tokante tópikonan ku ta semper interesante pa bo ta na altura di dje. Un konsumidó konsiente sa kiko ta su derechi- i debernan. Kòrda suskribí via e lenk abou na e página aki pa risibí nos revista tur luna den bo mailbòks.
Marc Marshall
Direktor Fundashon pa Konsumidó
Despues di lunanan di fakansi i atrobe un tremendo Curacao North Sea Festival nos ta kla pa sigui ku e revista digital di Fundashon pa Konsumidó. Manera semper un revista yená ku informashon valiosio pa kada konsumidó tuma nota di dje i tene na kuenta kada biaha ku e ta hasi kualke kompra.