Masha tiki salu
Bo mester masha nada di sodio: un adulto mester bou di sirkunstansia normal mas òf ménos 0.4 gram di sodio pa dia. Pues bo tin sufisiente na 1 gram di salu pa dia.
Den práktika bo por keda asta sin agregá salu den kuminda. E kantidat di salu ku bo mester pa dia bo por haña masha fásil tambe pa medio di kumindanan ku di naturalesa ta kontené sodio.
Uso di salu
Investigashonnan ta sugerí pa konsumí un máksimo di 6 gram pa dia, pero ménos ta mas mihó. Bo kurpa tin sufisiente na 1 gram pa dia.
Salu riba etikèt
Hopi di nos ku kier kontrolá i manehá nos konsumo diario di salu, por haña nos konfrontá ku un wesu duru. Hopi fabrikante no ta indiká riba e etikèt kuantu salu òf sodio tin den e produkto. Hasi un eskoho konsiente e ora ei por ta hopi difikultoso. Ainda na Kòrsou no tin lei ku ta obligá e fabrikante pa anunsiá e kantidat di salu riba etikèt di e produkto. Esaki ta hasi un eskoho konsiente muchu mas difísil pa nos.
Ròl di e fabrikante
Kome ménos salu ta zona mas fásil ku e ta. Mayoria salu ku nos ta konsumí (un 75%) ta skondí den nos kuminda diario. Voral kumindanan ya prepará – manera keshi, pan, sòpi, i sousnan ta kontené hopi salu skondí ku e fabrikante ta agregá pa duna un mihó smak i pa mantené e produkto su durabilidat.