Último añanan nos ta tende masha hopi e palabra cloud. Pero kiko ta cloud? Ta algu ku ta solamente pa negoshi? Òf algu pa tèblet so? Den e artíkulo aki nos lo dunabo un bista global kiko cloud ta enserá i nos ta tene nos mes solamente na Cloud pa uzo personal of negoshi chikí.
Mayoria software semper mester a wòrdu “instalá” riba bo kòmpiuter pa bo por hasi uzo di dje. Bo por hasi uzo di dje solamente ora bo ta sinta na bo kòmpiuter.
Poko poko e programanan a transformá na un manera ku bo por hasi uzo di nan for di kualkier aparato konektá ku internèt. Por ehèmpel un kòmpiuter, leptop, tèblet òf telefon. Bo por traha un dokumento riba “Google Docs” of drecha un pòtrèt riba “Pixlr” sin ku e programa ta instalá riba bo kòmpiuter.
E palabra cloud ta similar na Online. Dor ku mayoria biaha ora nan pinta un nètwèrk nan ta pinta e pida online manera un Cloud, pues un Nubia. Den uzo personal, pues no di kompania, nos ta deliniá tur file òf programa ku ta aksesibel via di internèt komo “Cloud” of Online.
E promé servisio ku ta disponibel online ta “webmail”. Na 1996 Hotmail a kuminsá ku esaki. Awendia kasi tur e-mail ta disponibel via di un webmail, pues online.
Kasi tur tipo di programa ta disponibel online. Microsoft Office, Photoshop, Antivirus, software pa tene reunion i pa hasi yamada ta algun ehèmpel.
No solamente e programanan ta online pero e filenan ku bo ta traha riba dje tambe.
Servisionan manera Dropbox, Google Drive i Microsoft su Onedrive ta algun ehèmpel. Tur ta ofresé un kantidat di Gigabyte pòrnada i si esaki no ta basta bo por paga pa haña mas espasio.
den nubia
Benefisio
E benefisio di mas grandi ta ku bo no ta mara na un kòmpiuter mas si bo mester di un programa òf un file. Tambe tin vários opshon ku ta pòrnada. P.E. Google Docs ta pòrnada kompará ku Microsft Office.
Desventaha
Ora bo apliká na un servisio online bo mester lesa e kondishonnan. Mayoria biaha tin pará aki den ku nan por hasi kambio na e servisio sin previo aviso.
Tambe hopi biaha tin pará aden ku nan por kita bo filenan si nan no ta kumpli ku sierto kondishon. Tin biaha tambe nan ta bisa ku nan mag uza bo potrètnan pa hasi propaganda ku nan.
Ora bo ta hasi uzo di un servisio online esaki no ta disponibel ora bo no tin internèt.
KOMPARÁ I KUMPRA