Mirando e nesesidat pa tene preisnan di produktonan di promé rekurso bou di kòntròl pa asina personanan di ménos rekurso semper tin akseso na e produktonan aki, gobièrnu di Kòrsou ta regulá preis di un kantidat di produkto, e asina yamá Makutu Básiko.
Dia 26 di ougùstùs 2014, Andrea Geerlof, hurista di Fundashon pa Konsumidó a entrevistá señor
Ronny Cornelis, Hefe Interino di Inspekshon Ekonómiko, i a base di e informashon ku a bin dilanti den e entrevista a skibi e siguiente artíkulo. Un danki ta bai pa señor Cornelis pa su kooperashon pa por a hasi e artíkulo aki posibel.
Makuto Básiko
E makutu básiko ta konsistí di un kantidat di produkto riba kua gobièrnu ta pone un preis máksimo. Negoshantenan no tin mag di pone un preis riba e produkto ku ta surpasá e preis ku gobièrnu a stipulá. Algun di e artíkulonan ku e Makutu Básiko ta kontené ta: aletria, aros, hariña, lechi, zeta dushi, kuminda pa beibi, algun fruta i berdura i tambe algun produktonan higiéniko manera toaya sanitario.
Ministerio di Desaroyo Ekonómiko ta kontrolá preisnan di e produktonan di e Makutu Básiko pa garantisá ku negoshantenan ta tene nan mas na e preisnan máksimo ku gobièrnu a stipulá.
Preis máksimo
Manera e palabranan mes ta bisa, preis máksimo ta nifiká ku e komersiante por bende e produkto te ku e preis stipulá. E por bende e produkto mas barata pa kompetí ku otro negoshinan i krese su benta. Pero lokual a bini na kla, ta ku den práktika negoshantenan tur ta pone nan preisnan na e preis máksimo. E intenshon di e preis máksimo no tabata pa tur negoshante bai bende e produkto na e preis máksimo fiho aki, pero pa mas bien tin un preis máksimo pa e konsumidó i ku bou di e preis aki komersiantenan por kompetí ku otro. Konsekuentemente konsumidónan a haña nan konfrontá ku e fenómeno ku e preis di kasi tur e artíkulonan di Makutu Básiko ta igual na e preis máksimo na kasi tur negoshi.
Pa logra baha e preisnan tòg, Ministerio di Desaroyo Ekonómiko a disidí di kambia e sistema aki ku den práktika no tabata funshonando. Pronto negoshantenan lo no ta mará na un preis máksimo pero na un márgen di ganashi máksimo riba kada produkto ku ta kai den Makutu Básiko.
DERECHI I DEBER
Adaptashon di
MAKUTU Básiko
Entrevista ku sr. Cornelis, Hefe Interino di Inspekshon Ekonómiko