Un aña eskolar nobo
Nos edishon nobo di Konsumidó Alertá Digital tin e luna aki komo liña kòra e aña eskolar nobo i tur trámitenan ku nos konsumidónan, mayor, muchanan di skol i studuitantenan, mester regla i tene kuenta kuné den e luna benidero.
Den estrecho i bon koperashon ku Ministerio di Desaroyo Ekonómiko nos a hasi e komparashon di preis Back to School 2014, den kua kontroladónan di Inspekshon Ekonómiko a hasi e anotashonnnan a base di kua nos fundashon a hasi análisis i publiká e informashon pa nos konsumidónan. Muestra di bon kolaborashon i kompartimentu di informashon i esfuerso, ta krea sinergia i ta evitá dòbel trabou.
Pa den futuro nos fundashon lo ke hasi mas kolaborashonnan asina’ki ku mas servisionan di kòntròl di gobiernu manera Inspekshon di Salubridat, SBAB pa asina fungi komo e brug entre nos konsumidónan i servisionan di kontrol di gobiernu.
Di parti di Bureau Telecommunicatie & Post nos a bolbe risibí un kontribushon di e departamentu di Caricert, ku tin komo funshon konsientisá nos tur di riesgonan ora usa internèt i kon protehá nos kompiuter i telefon kontra posibel atakenan di malechornan.
Tambe nos tin un entrevista ekstenso den e edishon aki ku sra. Marilyn Alcalá Wallé, ku ta dediká su mes ku su fundashon na nos eks studiantenan ku tin problema ku pago di nan finasanan di estudio na Hulanda.
Konsumidó Alertá Digital asinaki ta hañando mas i mas e formato ku nos di Fundashon pa Konsumidó tin komo vishon: di ta un plataforma pa un i tur ku ke duna un aporte positivo na drecha e posishon di nos konsumidónan, ku informashon al kaso i ku ta yuda kada un konsumidó drecha su posishon riba merkado ekonómiko di Kòrsou. Kolaborando i kompartiendo informashon pa yega na un merkado mas transparente, mas husto i den kua nos tur por disfrutá di produkto i servisionan di kalidat na un preis i bou di kondishonnan ku ta kumbiní nos kada unu.
Nos tur ta konsumidó.
PRÓLOGO
Marc Marshall
Direktor Fundashon pa Konsumidó
ku kontribushon di:
Marilyn Alcalá-Wallé
Foundation