Mas tantu funshon un smartphone tin, mas lihé e bateria ta kaba, lokual ta pone ku bo tin ku rekargá e telefòn por lo ménos 1 bes pa dia. Esaki sigur ta e defekto ku ta trese mas desapunto ku n’e di e kòmpiuternan aki ku ta trahá pa fit den bo saku; sigur si esun di bo ta usa asina tantu energia ku bo bateria no ta wanta henter 1 dia. Sinembargo, no desesperá! Aki nos ta duna bo algun tep no muchu sofistiká riba mantenshon di bo smartphone ku lo alargá bida di e bateria di bo smartphone.
Nivel di klaridat di bo pantaya
Pa loke ta trata e punto aki, ta opvio ku bo pantaya ta esun ku ta hala mas tantu energia di bo bateria. Mas grandi i mas kla bo pantaya ta, mas di bo bateria e ta hala. Pues, si bo baha e nivel di klaridat di bo pantaya i hasi e tempu ku e pantaya ta tuma pa time-out mas kòrtiku, esaki por yuda ku e bateria di bo smartphone ta dura mas tantu i bo por hasi uso di bo smartphone na e momentu ku mas bo mester di dje.
Pone atenshon na Wi-Fi i Bluetooth
Ta fantástiko ku bo smartphone tin funshonnan manera Wi-Fi i otro kosnan, pero si bo lag’é aktivá henter ora, e ta kaba ku bateria di bo smartphone muchu mas lihé. Pa evitá esaki, djis paga bo Wi-Fi, GPS òf Bluetooth te ora di bèrdat bo ta bai usa nan. Ora bo paga e Wi-Fi, bo smartphone ta stòp di buska i purba konektá ku tur señal di Wi-Fi den e área. Esaki tin komo resultado ku bo bateria ta wanta muchu mas tantu riba un dia!
Kita tur aplikashon ku bo no ta usa
Lamentablemente, ta imposibel pa semper sa kua aplikashonnan ta bezig ta drai den background i ta usando mas tantu energia di bo bateria. Ta p’esei ta bon pa bo kita for di riba bo smartphone tur aplikashon bieu òf aplikashonnan ku bo no ta usa, ku tin funshonnan outomátiko òf funshonnan ku por hasi mas ku 1 kos pareu, ku por tin influensiá riba durabilidat di bo bateria.
KOMPARÁ I KUMPRA