Studiantenan ku tin debe por drenta un areglo di pago ku Hulanda?
Sigur ku si! Pero esaki ta posibel solamente pa e parti di e debe, ku no a ser pone den man di un deurwaarder. P’esei ta importante pa kada ken ta bon na altura kon e sistema di DUO ta traha i semper ta na altura di tur korespondensha ku DUO manda pa nan.
Hopi biaha bo ta tende ku deurwaarder of Incasso-bureaus ta pone hopi gastu riba e montante..Ki tin di bèrdat den esaki i kon un persona mes por kontrolá esaki?
E problema prinsipal ta sinta den e echo ku hopi biaha e eks studiante aki no tin un bista real kuantu sèn e debe i tin di paga na deurwaarder. Pa esaki nos a logra huntu ku DUO ku awor deurwaarder mester indiká presis kiko e ta kobra, kua dossier e ta kobra i kua ta e gastunan ku e tin ku kobra. E eks studiante tambe por komprobá esei dor di pidi un “uitstel” na deurwaarder i tuma kontakto ku DUO i kontrolá e informashon risibí, promé ku drenta un areglo.
Importante menshoná ku semper ta mihó drenta un areglo di pago ku DUO i no deurwaarder ya ku e gastunan di p.e. interes na Hulanda ta hopi mas abou ku na Kòrsou i e interes ku nan stipulá pa bo ta keda 5 aña válido.
Sra Alcalá, nos a risibí awe hopi informashon valioso tokante e problemátika aki. Un último rekomendashon?
Esaki ta speshal pa esnan ku awor ta bai studia na Hulanda. Ta hopi importante pa kada studiante ta bon informá di e sistema di finansiamentu di estudio na Hulanda pero prinsipalmente e sistema di pago bèk. Ta hopi importante tambe pa mayornan sirbi di guia. Pasombra na momentu ku e studiante faya òf kaba di studia, den mayoria kaso ta e mayor a firmá i ta responsabel pa e debe. Siña e yu pa evitá di hinka su kurpa den debenan grandi i biba segun su forsa ora e ta na Hulanda. I si dado kaso un kos a bai robes i a stòp e estudio, tuma kontakto mas lihé posibel ku DUO pa bo sa kon e pagamentu bèk ta sinta den otro. Si bo sa e reglanan di DUO bo por spar bo mes basta doló di kabes despues.
Sra. Alcalá Wallé, danki pa bo kontribushon na e tópiko aki i nos ta konta ku Marilyn Alcalá-Wallé Foundation lo sigui duna asistensha na nos konsumidónan ku ta den e situashon fèrfelu aki.
Pa mas informashon di tópiko interesante aki, por subi e Facebookpage Marilyn Alcalá-Wallé Foundation of por email Sra.Alcala-Walle na [email protected].