Un konsumidó a planeá un biahe pa Hulanda. Den e planifikashon di esaki korektamente e la buska informashon kiko ta tur e kosnan ku e mester pa hasi su biahe lo mehor posibel. Sra. a aserka un agensia di biahe i a haña di komprondé ku pa biaha pa Hulanda e no tin mester di un Visa. Un dato interesante ta ku e señora ta un estranhero kasá ku un yu di tera...
Intermediashon di Fundashon ta revelá lo siguiente:
• Ku enbèrdat Arke Fly a para konsumidó pasobra e no ta tin tur dokumentu nesesario.
• Ku konsumidó debidamente a informá su mes promé ku e biahe.
• Ta bèrdat ku un agensia di biahe a indiká na konsumidó ku e no mester di Visa pa bai Hulanda.
• Ta un echo tambe ku na Arke Fly sí nan a informá na konsumidó ku ta mihó e dòbel chek na su konsulado òf gabinete di Gobernador pa e tin sigur ku e por biaha ku e pasport di su pais di orígen. (sin Visa)
• Konsumidó mes a disidí ku e ta reserva i kumpra su ticket tòg (tene kuenta ku no mester di un visa pa bo kumpra un ticket)
• Por último, E ticket kumprá ta unu den speshal i non-refundable
Ku e tur e informashon aki den man, Fundashon pa Konsumidó a purba intermediá wak tòg kon lo por regla algu pa e konsumidó, pero konforme e kondishonnan general di Arke Fly ku ta bisa si pa un òf otro motibu ku no ta okashoná pa e aeroliña, konsumidó no por biaha mas òf ser impedí di tuma parti na e buelo, konsumidó ta pèrdè tur derechi!
Moraleha di e kaso aki:
Aunke un komersiante òf kompania tin e obligashon di duna informashon kompletu i di di forma komprendibel na su klientenan, kada konsumidó tambe tin e derechi di buska pa su mes E informashon ku pa E ta importante i relevante. Den e kaso aki ora ku e kompania a indiká na konsumidó di no ta sigur i ku ta mihó e informá mas aleu, tabata konsumidó su deber di a hasi esaki ya e tin sigur ku e lo por a biaha si òf no..!
DI otro banda den kasonan kaminda ta pa un of otro motibu ageno na e konsumidó, por ehèmpel na momentu di kanselashon di un biahe dor di e kompania, konsumidó tin derechi di haña su sèn bèk i tin derechi di haña pago pa e gastunan èkstra ku e mester hasi pa e motibu aki. Den kaso ku a usa parti di e pasashi kaba, e konsumidó tin derechi di haña sèn bèk na rason di e parti ku no a wòrdu usá ainda.