Un tiki mas lat ku normal nos ta
presentá e edishon di mei di Konsumidó
Alertá Digital. E luna aki nos ta dediká atenshon
na tur loke tin di haber ku e periodo ku hopi di nos ta anhelá na dje hinter aña: bo fakansi. Un periodo den kua hopi di nos ta bai afó i tuma tempu pa distraí i relahá nos kurpa i asina karga nos bateria pa sigui ku trabounan diario despues. Komo ku nos ta un isla rondoná di awa un biahe ta nifiká kasi semper un buelo ku avion pa un destinashon den eksterior. Aki nos ta pone atenshon den e edishon di e luna aki na kosnan ku nos mester tene na kuenta di adelantá i promé ku nos kuminsá ku nos vakashon. Kondishonnan General di kompanianan di aviashon, kiko un seguro di biahe ta enserá i pakiko nos mester sòru pa sera unu. Pero tambe tepnan práktiko pa paketá nos maleta i pa skohe nos destinashon di fakansi.
Loke sigur nos no por a laga afó di e edishon di e luna aki ta un reportahe di e konferensha organisá pa Fundashon pa Konsumidó den kuadro di entrega di e konsepto di lei pa yega na un Korte di Konsumidó. Dia 27 di mei último esaki a tuma lugá den oula di Universidat di Kòrsou kaminda oradónan Prof. Jan de Boer i Prof. Gerhard Rijken a splika na un oudiensia di mas ku 100 partisipante e importansha i kon e Korte di Konsumidó lo bai funshoná asina e lei aki keda aseptá. Ku entrega di e konsepto di lei na Minister mr. Nelson Navarro ofisialmente Fundashon pa Konsumidó a pone e trayekto den moveshon pa asina e lei por kana su proseso di akseptashon i introdukshon. Nos lo sigui e desaroyo aki di aserka i lo informá nos komunidat konsumidó tokante esaki.
Nos ta deseá tur nos konsumidónan ku ta saliendo di
biahe un fakansi plasentero i disfrutá di e fakansi
meresé. I si bo presupuesto no ta laga espasio
pa un biahe òf si bo tin plannan pa kua bo ke
spar i warda bo sèn, kòrda ku nos
dushi isla tambe ta ofresé hopi
posibilidat di pasa un temporada di
relaho. Bo por eksplorá i siña konosé
bo nos dushi Kòrsou i tuma bo
tempu pa apresiá i gosa di tantukos
bunita ku nos pais ti di ofresé. No
ta pòrnada tin hopi turista ta bin
bishitá nos dushi isla.
Un felis periodo di vakashon!
Marc Marshall
Direktor di
PRÓLOGO
E aña aki:
bo fakansi ta den bo man