BO SALú
Grip ta bini mayoria biaha diripiente. Bo ta sinti bo mes den un par ora ta bira mas malu. Ta eksisití varios tipo di e vírus di grip. Nos sistema defensivo por wòrdu hopi afektá dor di grip. Ta pa e motibu aki mester evitá ku un hende ku grip haña un infekshon manera por ehèmpel un pulmonia. Pa un hende salú e grip ta un molèster pero nada di gravedat. Na momentu ku un persona ta suak kaba dor di un otro malesa grip por ta peligroso.
E kousa di grip
E vírus di grip ta hopi kontagioso i ta wòrdu traspasá dor di líkido afektá ku ta den aire. E vírus ta wòrdu plama dor di nister, papia òf te hasta ora di duna otro man. Paso e vírus ta asina kontagioso e ta bini komo un epidemia.
Konsulta bo dòkter di kas
Na momentu ku bo tambe ta kai den e grupo di rísiko ta konsehabel pa bishita bo dòkter di famia. Grupo di rísiko kiermen, hende ku malesa króniko i hopi suak. Tambe hende nan hopi grandi ta pèrtenesé na e grupo aki.
Kon kombatí grip
Bo no por evitá kontagio ku e vírus di grip. Pero loke si nos por hasi ta pa no haña molèster di e síntomanan di e malesa si nos pèrkurá pa keda den un bon kondishon, i hisa nos sistema defensivo. Fuera di esei ta di sumo importansha pa nos pèrkurá pa un bon nutrishon, sufisiente sosiegu, sufisiente rekreo i hopi moveshon.
Vakunashon
Hendenan ku ta kai den e grupo di rísiko ta bini na remarke pa un vakuna kontra di grip. E vakuna ta hisa e sistema defensivo di nos kurpa pa evitá ku bo ta haña grip. E vakuna kontra di grip bo por tum’é serka bo dòkter di kas. E vakuna di grip aki ta konsehabel pa hendenan riba 60 aña. Hende ku ta sufri di kurason i problema ku pulmon, diabétiko i pashènt di nir por haña problema serio dor di e vírus di grip.
Variante nobo
E epidemia grandi di grip ta wòrdu okashoná dor di vírusnan nobo. Paso e ta un sorto di vírus nobo hopi bes nos sistema defensivo no por resistí. E vírus por plama masha lihé.
Den nos tempu moderno
Awendia nos ta biba den un komunidat kaminda desaroyonan ta kana hopi lihé. Nos ta dediká tiki tempu i atenshon na mantené i kuida nos salú. Entre otro pa e motibu aki vírusnan di grip nobo por surgi masha fásil.