2. Sòru pa bo check in i t’ei na bo gate na ora
Kada buelo tin deadline pa check-in. Wak pa bo tei trempan. Si bo no tei na ora, e kompanianan di aviashon por nenga di laga bo bula ku nan. Segun ArkeFly su kondishonnan general, bo ta pèrdè bo derechi di hasi uso di e buelo; ArkeFly por ninga di laga bo bula i aparte di esei, e no tin niun klase di responsabilidat mas pa ku bo. Si ta ku KLM bo ta bulando, KLM por kanselá bo reservashon i e reservashon di bo stul i e tampoko no tin responsabilidat mas pa ku bo. Klóusulanan asin’aki tambe eksplísitamente ta poné den e kondishonnan general di Insel Air i Air Berlin. Esaki no ta konta pa check in so, pero tambe e deadline pa subi avion. Riba bo ticket tin un orario poné ku ta indiká ki ora bo mester t’ei na e gate kaminda bo avion ta pa kuminsá subi abordo di e avion. Si bo no tei na ora, tambe bo por pèrdè bo derechi pa bula ku e kompania di aviashon.
Pues e diferente kompanianan di aviashon por usa diferente palabra den nan kondishonnan general, pero den tur kaso e resultado ta: Bo ta keda aki abou i no ta bai niun kaminda!
3. Ta dependé di e ticket ku bo a kumpra si despues bo por hasi kambio òf anulá e ticket
No ta tur ticket bo por kambia òf anulá. Tin ticket, pa motibu di e tarifa ku bo a paga, ku bou di niun sirkunstansia por wòrdu kambiá òf kanselá. P’esei wak bon ora bo ta buk si e ticket despues por wòrdu kambiá. Si despues di a kumpra e ticket algu sosodé ku ta impedí bo pa bula riba e fecha ku bo a kombení ku e kompania di aviashon, den e kaso ku e ticket ta non-refundable lo bo no haña bo sèn bèk. Si bo tin un ticket ku ta duna bo e posibilidat di hasi kambionan i bo hasi kambio, e kompania di aviashon lo por kobra bo un montante adishonal na gastunan di atministrashon.
4. Si bo mester di asistensia spesial pa motibu di un òf otro desabilidat, pidi esaki na ora
Si pa motibu di un òf otro desabilidat bo mester di asistensia spesial, bo mester sòru pidi esaki na ora. Preferiblemente hasi esaki ora bo buk e buelo òf pa mas tardá 48 ora promé ku ora di buelo. Insel Air ta pone den nan kondishonnan general tambe ku pa motibunan di seguridat, un buelo ku un MD tin espasio pa akomodá un máksimo di 5 ròlstul, miéntras ku pa un buelo ku un F50 e kantidat máksimo ta 2 ròlstul. Den kaso ku e pasahero keda sin pidi asistensia spesial na ora (mas tardá 48 ora promé ku salida di e buelo), e kompania di aviashon por nenga di laga e pasahero bula kuné.
5. Si bo ta na estado i aserkando bo fecha pa duna lus, chèk promé si bo por bula ku e kompania di aviashon
Sierto kompanianan di aviashon tin reglanan estrikto pa loke ta trata laga hende muhénan na estado bula ku nan. Air Berlin por ehèmpel no ta transportá muhénan na estado ku falta ménos ku 4 siman pa nan fecha di duna lus. Pues si bo tin mas ku 36 siman na estado, bo no por bula ku Air Berlin. Air Berlin a base di nan kondishonnan general tin e derechi pa pidi bo pa un deklarashon di dòkter kaminda e ta indiká ku ainda bo no tin 36 siman na estado.
ArkeFly tambe tin reglanan spesífiko formulá den nan kondishonnan general pa loke ta trata transporte di un muhé na estado. Si bo embaraso no a pasa 27 siman, no tin restrikshon pa bo bula ku e ArkeFly. Si bo ta entre bo di 28 i 36 siman di embaraso, ArkeFly mester duna su aprobashon promé ku bo por bula ku n’e i bo mester entregá un deklarashon di dòkter ku ta indiká ku bo ta den un estado ku bo por bula i ku no tin niun opheshon kontra di esaki. Si bo a drenta bo di 36 siman si embaraso, lo bo no por bula ku ArkeFly.
KLM di su banda ta indiká ku den sierto kasonan KLM tin ku duna su outorisashon promé ku e señora na estado por bula ku n’e. Riba su wepsait e kompania di aviashon ta duna komo konseho pa no bula si bo a drenta bo di 36 siman di embaraso.
6. Keda sin informá tokante bo desabilidat òf un kondishon físiko òf mental por kosta bo
Si bo keda sin informá e kompania di aviashon di un kondishon físiko òf mental òf kisas un desabilidat i en konekshon ku esaki e avion tin ku desviá for di su ruta pa un destinashon ku no tabata di plan, e kompania di aviashon por kobra bo e gastunan ku el a hañ’é ta hasi en konekshon di esaki!
Nos ta spera e teps ariba menshoná tabata di yudansa pa abo ku ta planiando bo vakashon. Di nos banda nos ke deseá bo un dushi fakansi.
Kondishonnan
general di kompania di aviashon