Ku sumo plaser mi ta invitábo pa lesa un edishon mas di Konsumidó Alertá Digital. Den e edishon aki nos ta pone atenshon speshal na tur lokual ta trata seramentu di un fiansa. Manera ya den pasado nos a trese dilanti, kondishonnan bou di kua nos ta hasi fiansa por drecha ainda hopi mas. Kontraktnan transparente, interesnan hustu i kondishonnan di pago razonabel ta aspektonan ku ta keda tratá den e edishon aki. E fenómeno di loansharks ta unu ku sigur den e tempu moderno di awendia ta algu ku mester para. Sigur si esaki ta sosodé riba un base ilegal. I nos ta na altura ku Banko Sentral ta trahando riba preskripshon pa maksimalisá interes ku fiadónan di sèn legal por kobra i tambe ta traha aktivamente pa kombatí ilegalidat den e sektor aki.
Importante ta transparensha. I transparensha ta algu ku nos mes mester eksihí. No laga niun hende hasi maluso di bo nesesidat. Eksihí pa sa adelantá kuantu interes bo ta paga, kiko ta e seguridatnan ku e fiadó ta pidi, kuantu bo ta paga na komishon i otro gastunan. E interes ta fiho òf e ta variabel? Mi por paga èkstra riba mi fiansa? Kiko ta pasa si mi muri òf pèrdè trabou? Informá bo mes bon i no mara bo mes na niun kontrakt tanten bo ta bon informá. I si e fiadó no por ta transparente, lag’é ku su sèn i buska un otro opshon.
Awendia tin mas banko i kompania ku ta fia sèn. Esaki ta nifiká ku nan mester kompetí pa fiabo sèn. Hasi bon uso di esaki i saka bo benefisio dor di pidi oferta seka mas ku un kompania. Tuma bo tempu i lesa e kondishonnan bou di kua bo ta fia sèn. Pidi konseho seka famia i amigunan. Òf tuma kontakto ku Fundashon pa Konsumidó. Wak kua sorto di fiansa ta pas mihó ku bo nesesidat di e momentu ei. Papia semper ku bo banko promé ku fia sèn riba kaya òf na kompanianan ku ta solamente lantá pa kobrabo interesnan demasiado haltu. Hasta pa un fiansa chikí por kumbiní bo di tuma kontakto ku bo banko. Nos a pone riba rei hopi di sorto di fiansa ofresé aki na Kòrsou pa asina bo sa kiko ta bo posibilidatnan di fia.
Mas importante ku tur kos ta ku bo mester ta konsiente ku si bo por sobra sèn pa paga un fiansa, bo por sobra sèn pa spar. Hasi sparmentu parti integral di bo bida. Traha e dam i warda awa pa momentu ku un mester yega na bo porta, ta kombení bo hopi biaha mas tantu ku fia sèn i paga interes.
PRÓLOGO
Tin fiadó di plaka ta
hasi maluso di bo nesesidat
Marc Marshall
Direktor di