Krédito Relámpago
Tin kompanianan ta ofresé fiansa relámpago kaminda lihé i fásil bo por fia montantenan chikí te ku algun míles di florin. Ta trata aki di fiansanan ku mester keda pagá den tèrminonan mas kòrtiku. Tin diferente sorto di kompania i personanan ku ta ofresé tipo di fiansanan asin’aki i no tur ora e kondishonnan ta favorabel pa e kliente. Kòrda puntra i kontrolá. Kompanianan ku ta ofresé fiansa mester semper tin un pèrmit di Banko Sentral.
Interes abusivo
Tin basta di e kompanianan ku ta hasi mal uso di e nesesidat di e fiadó i di burakunan den lei pa kobrabo gastunan haltu na interes, komishon, seguro i otro gastunan di atministrashon pa asina saka mas tantu plaka posibel for di e saku di e fiadó. Den práktika nos a yega di mira kontraktnan di te hasta 130%. Lei ta preskribí ku den tur kontrakt mester ta pará kuantu sèn e fiadó ta paga na komishon di krédito, e asina yamá APR. E lei aki tambe ta konta pa tur kompania ku ta fia sèn. Pues den nan kontraktnan tambe mester aparesé interes ku bo ta paga aña inkluso tur otro gastu adishonal. E kaso ta ku na Kòrsou nos no tin un lei ku ta stipulá un máksimo na interes ku un kompania por pidi pa su fiansa. Nos ta na altura si ku ya pa algun tempu Banko Sentral di Kòrsou i St. Maarten ta trahando riba un limit asina. Esaki sigur lo trese un paro na e interesnan abusivo riba nos merkado di fiansa.
Banda di esaki den hopi kaso e kompanianan ku ta ofresé krédito relámpago ta kobra butnan eksorbitante na momentu ku bo kai atras riba bo fiansa. Pues si riba korto plaso bo mester di sèn, pensa tres biaha promé bo hasi uso di un krédito relámpago. Si di bèrdat bo mester di un suma chikí di den purá, kis pa opshonnan manera para den kòrá ku sigur lo salibo mas barata.
sigui lesa