DERECHI I DEBER
Un fiansa por brinda un solushon den sierto momentunan, pero tambe por trese hopi doló di kabes pa e persona ku ta fia. Den e tempu moderno ku nos ta biba aden, hasimentu di fiansa ta bira kada dia mas normal. Hopi di nos por ehèmpel no ta ni pensa pa kumpra un kas òf outo nobo sin finansiamentu di banko. Lokual hopi biaha nos ta lubidá ta ku riba un fiansa nos tin ku paga interes bèk na sea e persona òf kompania kaminda nos a fia plaka. Anto no ta bankonan ta e úniko kompanianan ku ta fia plaka; tin otro kompania- i personanan ku tambe ta fia plaka.
Den e último añanan Fundashon pa Konsumidó a bin tuma nota di persona- i kompanianan ku ta fia plaka pero ta kobra interesnan astronómiko na e personanan ku ta fia. Tin biaha e persona ku ta fia tin ku paga mas ku dòbel di e montante fiá na interes na e persona- òf kompanianan aki.
Fundashon pa Konsumidó no a tuma nota di e problema aki di kobramentu di interesnan astronómiko den e sektor bankero, pero si den e otro kompanianan i personanan ku ta fia plaka.
Nos leinan no ta stipulá un interes máksimo riba kontraktnan di fiansa. Dor ku nos leinan no ta duna un máksimo, ta free for all tin ora dia fia plaka sea serka personanan òf kompanianan ku ta fia. Sinembargo nos korte komun di hustisia den diferente veredikto a stipulá ku un interes anual (pa aña) di mas haltu ku ta tolerá, ta unu di 18%. Tuma nota si ku nos ta papiando di interes anual (pa aña) i no mensual (pa luna).
Dikon esaki ta asina importante pa tene kuenta ku n’e? Fundashon pa Konsumidó a yega di wak kontraktnan di klientenan ku a fia serka kompanianan ku ta fia plaka i a ripará ku den sierto di e kontraktnan aki solamente e interes mensual ta wòrdu formulá. Un tasa di interes di 4% porta ta mustra manera un tasa di interes atraktivo. E persona ku ta wak e tasa di interes di 4% hopi biaha no ta bai wak ku esaki ta interes mensual òf anual.
Un interes di 4% mensual ta mesun kos ku un interes di (4 x 12= 48) 48% anual; un porsentahe muchu mas haltu ku e porsentahe máksimo ku korte ta stipulá di 18%. E porsentahe aki ta inkluí tambe gastunan adishonal manera seguro i otro gastunan ku e persona- i kompanianan ku ta fia ta kobra bo ademas di e interes.
E islanan BES (Boneiru, Sint Eustatius i Saba) for di 1 di yanüari 2013, si tin un tasa di interes máksimo stipulá den lei. E wega di free for all pa loke ta trata interes riba fiansanan pues no ta posibel mas na e islanan aki. E lei ta stipulá ku e tasa di interes máksimo ku un kompania ku ta fia na konsumidónan por kobra ta 24% anual.