DEN CHIKÍ
BATATA TA SALUDABEL?
Un artíkulo chikí pero interesante saka for di Consumentenbond.
Pa mantené e kurpa slank i elegante no nesesariamente mester evitá di kome batata. Batata siertamente ta kontené hopi kolhydrato, pero e ta yenabo bon. P’esei mayoria biaha un hende ta kome ménos di dje ku ora e ta kome aros òf pasta.
Un porshon di batata ta kontené ménos kilokaloria ku aros òf pasta, asta ora bo traha batata machiká i agregá un tiki lechi light i/ òf manteka aden.
Banda di esei batata ta kontené vitamina B6 ku ta importante pa un bon funshonamentu di bo sistema imunológiko i e sistema nervioso, vitamina C, ásido fóliko i fibra.
EKONOMIA INFORMAL
un oportunidat den tempu di krísis?
Mundialmente e pandemia di korona aki a proboká un kontrakshon drástiko di e merkado laboral. Tantu ekonomia di paisnan fuerte komo esnan ménos fuerte a mira kon den tur klase laboral hopi hende a pèrdè trabou a konsekuensianan di covid-19. E echo di no tin trabou òf no por a traha normal, kompañá pa e medidanan di keda kas, a pone hopi hende kai den un frustrashon real. Kon ta hasi traha di e forma aki? Ta sea “muri di hamber òf muri di e vírus”, ta algun dje gritunan di desesperashon ku bo ta tende.
Mester bisa si ku e impakto di e korona vírus aki lo por tabata muchu mas opio si no tabata pa e echo ku hopi sektor a adaptá lihé digitalmente durante e último lunanan. A fasilitá ku empleadonan por a traha na kas òf hasi posibel pa e kliente por atkerí su servisio òf kumpra su produktonan for di kas, hasi bestelling for di kas…
Pues, manera den tur tempestat òf sirkunstansia fèrfelu, por presentá un di 2 oportunidat. Esaki ta konta tambe pa esnan ku a pèrdè trabou dor dje pandemia aki.
Aki nos ta papia entre otro di e sirkuito di ekonomia informal. E sektor informal aki semper a ofresé oportunidatnan ekonómiko prinsipalmente na esnan ménos pudiente òf ku no por a drenta e sirkuito laboral, tambe por a yega na un granito finansiero. E sektor di ekonomia informal ta parti importante di e ekonomia di merkado, ku ta nifiká ku ta produsí un produkto òf servisio pa bende pa generá un benefisio ekonómiko propio.
Durante di e temporada ku nos aki tabata den lockdown nos por nota kon kreativo nos e hende por bira…Tabatin shoumentu kuminda, kostura i obra di man, trahamentu di pan i kos dushi…Si e tur esakinan tabata posibel komo pasa tempu, dikon no ban hasié awor di forma serio I dediká?
Algun ehèmpel:
Ofresé servisio di transporte, spesialista den dekorashon, guia pa hende grandi,
bendementu di kuminda, servisio di catering, spesialista di beyesa (manikür, pedikur, kabei), servisio di limpiesa kas i ofisina, fotografia komersial i turístiko, agrikultura den chikí.
Den e mundu teknológiko tambe tin
posibilidat pa esnan ku ta dominá e materia
i ta na ”kas” den e mundu ei. Asina bo ta
mira ku “sinta ketu” no mester ta un
opshon. Nos konseho: Bai den bo mes,
pone riba papel e lokual bo mes ta kere bo
ta bon den dje I ban wak kon por krea
un posibilidat finansiero nobo
for di dje…EXITO..!!