INTERMEDIO
Den e lei inisial di kompetensia FTAC tabatin tambe e tarea pa kontrolá fushonnan entre kompanianan i averiguá si e fushon lo krea un partido bendedó muchu grandi i poderoso riba un merkado ku lo por trese desbalansa den kompetensia riba un merkado. A disidí den e trayekto di legislashon pa kambia e ròl di investigá i aprobá di FTAC den un sistema kaminda kompanianan ku ke hasi un fushon solamente tin e deber di mèldu esaki na FTAC, ku por tin konsekuensia pa un kompetensia hustu.
Banda di e Outoridat di Kompetensia tambe a keda trahá un konsepto di lei pa un Outoridat di Regulashon i un Outoridat di Konsumidó. E tres outoridatnan aki mester a funshoná banda di otro i den un estrecho divishon. Na momentu ku un merkado na ta habrí i kompetensia no ta liber, e merkado aki ta kai bou di supervishon di e Outoridat di Regulashon. Merkadonan ku sufisiente kompetidó, liber i habrí ta kai bou di supervishon di e Outoridat di Kompetensia i e Outoridat di Konsumidó ta supervisá e relashon entre e bendedó i kumpradó poniendo reglanan di benta i kalidat di servisio ku kada kompania ku tin pèrmit pa bende riba un merkado mester tene su mes na dje.
Te ku awor Bureau Telecommunicatie & Post (BTP) ta un di entidat ku a base di lei ta regulá algun di e sektor ku gobièrnu a apoderá pa regulá parsialmente. Banko Sentral, Gaming Control Board, ta otro ehèmpelnan di entidatnan ku gobièrnu a apoderá pa supervisá merkadonan manera banko, seguro kasino. E importansia pa instituí e tres entidatnan aki ta sumamente importante. Sigur mirando ku, a base di lei, FTAC no tin e poder pa desaprobá fushonnan entre kompanianan i impedí ku un partido por bira muchu grandi riba un merkado i kasi krea un monopolio. E ròl di Outoridatnan independiente di Regulashon, Kompetensia i Konsumidó lo ta hopi importante pa disidí na kua momentu ta regulá i imponé reglanan pa un merkado òf ta laga esaki habrí i liber teniendo semper na kuenta normanan di kalidat di produkto i servisio pa e konsumidó ku ta kumpra.