Aktualmente i sigur durante di e siguiente lunanan, COVID 19 lo keda notisia na tur parti di mundu. Pa e motibu aki, nos di Fundashon pa Konsumidó tambe ta analisá e desaroyo di e vírus aki pa asina garantisá ku nos konsumidónan ta debidamente informá.
KARENTENA OBLIGATORIO NA KAS
Resientemente a tuma lugá un rueda di prensa den kual Gobièrnu di Kòrsou a indiká ku lo laga yunan di tera pegá na Aruba i St. Maarten drenta Kòrsou bek sin bai den karentena na un hotèl. Esaki debí na e diferente gritunan den komunidat, den kual a duna di konosé ku no por paga e karentena obligatorio den hotèl. Manera ya bo sa, esaki ta un obligashon ku Gobièrnu di Kòrsou a stipulá pa asina garantisá i monitoriá e desaroyo di personanan ku a drenta nos Pais.
Pa e motibu aki Gobièrnu huntu ku diferente partido entre otro: Kuerpo Polisial i tambe departamentu di asuntunan general a sinta pa asina yega na un posibel solushon. Durante e rueda di prensa a komuniká ku a yega na e solushon i ku esaki ta enserá ku e pasaheronan pegá na Aruba i St. Maarten lo no tin ku paga pa keda den un hotèl, pero si tin ku keda den karentena obligatorio na kas durante 14 dia. E medida aki ta drenta na vigor djabièrnè 14 di ougùstùs 2020 i ta bálido tambe pa e personanan ku ya ta den karentena na un hotèl i ku lo ke hasi esaki na kas.
Naturalmente tin algun kondishonnan mará na e medida aki. Unu di nan ta ku e personanan aki lo mester hasi un petishon na [email protected]. Gobièrnu na su turno lo manda tur kondishon i palabrashonnan nesesario. Kuerpo Polisial tambe tin un ròl hopi importante den e proseso aki. Polis lo monitoria i kontrolá si e persona di bèrdat ta mantené su mes na e reglanan.
Pa por hasi esaki, nan lo kontrolá via e sistema di ‘videocall’, ‘GPS Location’ i tambe yamada telefóniko. Tambe ta eksistí e posibilidat ku Polis lo por pasa na kas i kontrolá si e persona ta na kas. Si un persona no ta kumpliendo ku e lei di karentena, Polis lo notifiká departamentu di epidemiologia.
Ta bon pa menshoná ku e motibu dikon a disidí pa laga yunan di Kòrsou pega na Aruba i St. Maarten bini bek, ta paso ku e kantidat di personanan aki ta manehabel. Esaki ta nifiká ku e kantidat no ta grandi i ku si dado kaso tin un persona ku e vírus, fásilmente esaki por keda manehá i detektá pa e profeshonalnan.
E situashon aktual di COVID 19 na Kòrsou
Te ku ainda nos tin 32 kaso den kual 1 ta aktivo, 30 ku a rekuperá i 1 ku lamentablemente a fayesé. Fundashon pa Konsumidó ke konsientisá i kòrda tur persona pa sigui mantené e reglanan di distansia sosial, laba man konstantemente, desinfektá i kuida di bo mes i tur sobrá rondó di bo. Nos a komportashon ta nos salbashon. Ban sigui batayá kontra di e ‘Corona’, huntu pa un Kòrsou salú.