DEN CHIKÍ
BATATA TA SALUDABEL?
Un artíkulo chikí pero interesante saka for di Consumentenbond.
Pa mantené e kurpa slank i elegante no nesesariamente mester evitá di kome batata. Batata siertamente ta kontené hopi kolhydrato, pero e ta yenabo bon. P’esei mayoria biaha un hende ta kome ménos di dje ku ora e ta kome aros òf pasta.
Un porshon di batata ta kontené ménos kilokaloria ku aros òf pasta, asta ora bo traha batata machiká i agregá un tiki lechi light i/ òf manteka aden.
Banda di esei batata ta kontené vitamina B6 ku ta importante pa un bon funshonamentu di bo sistema imunológiko i e sistema nervioso, vitamina C, ásido fóliko i fibra.
PASA DEN BO LISTA!
Fakansi 2020 ta den su rekta final, loke ta nifiká mesora ku skol ta den kuminsá.
Kasi sigur mayoria mayor ya a regla tur kos pa un bon komienso di un aña eskolar
nobo pa nan yunan. Pero pa esnan ku ta gusta laga e kosnan pa último momentu, ta
bon pa para ketu tòg na algun rekisito nesesario, banda di bon ánimo, aktitut i
perseveransia, pa bo yu(nan) por tin un aña eskolar eksitoso!
Un bon tas kómodo i espasioso
Promé ku tur kos, un studiante mester di un bon tas pa warda tur su artíkulonan di skol i su kosnan di uso personal. Importante ta ku esaki mester ta kómodo i e mester ta algu ku e mucha ta gusta, teniendo kuenta ku ta algu ku e tin di bai usa tur dia. Un bon tas ta unu: ku ta wanta e peso di e bukinan i no ta kansa e mucha su lomba.
E tin strèpnan hanchu i e ta konta ku un bon furu paden. Un tas ku vários kompartimentu sigur ta ideal ya asina e mucha por pone kada kos riba su kurpa i no tin nodi di buska hopi despues.
Un bon kèts òf sapatu
Bo tabata sa ku nos pianan ta base di e kurpa i ku esakinan tei pa garantisá stabilidat di e rudia, hep i bo lomba? Nos pianan tin ku wanta tur e peso di e kurpa i nan ta konstantemente aktivo durante dia.
Pa e motibunan aki, mas ku un asesorio, nos sapatunan ta un dje prendanan mas importante pa e salú di un mucha. Un sapatu òf kèts pa skol mester ta unu kómodo pa evitá doló di pia i leshon, ora usa esaki durante basta ora. Rekomendabel ta pa wak un sapatu ku ta anti-slep i di material duradero.
Aki ta importante
pa no djis wak e
preis, stail i trènt,
pero invertí den un bon “kos di pia”
ku e mucha por bai largu tempu kuné.
Tep: Ora ta bai kumpra un bon kèts, bai ku e mucha mes i preferibel bai parti atardi, ya ora di pas, e pia lo ta den su momentu mas hanchu i esei ta e límite di e pia. Di e forma ei bo no ta kumpra un kèts ku ora e pia hancha lo sintié pèrtá.
Kon bon prepará bo ta
promé ku skol kuminsá
?