ALGUN VIDEO POPULAR RIBA YOUTUBE
SPESIAL PA NOS MUCHANAN
YouTube pa Tiner
Banda di YouTube Kids, tin un otro opshon ku ta sigurá ku videonan ku mensahe òf efektonan negativo no ta aparesé riba e aparato ku e yu ta wak YouTube riba dje. E otro opshon aki ta spesial pa muchanan un tiki mas grandi. E opshon aki yama na ingles ‘restricted mode’ i na ulandes ‘beperkte modus’.
Pa por protehá e tiner, Google (doño di YouTube) ta hasi uzo di tur tipo di señal pa asina detektá i filtra den videonan ku por kontené violensia òf kualke otro tipo di kontenido no apropiá. Pues, e tiner di un variedat mas amplio di video ku e por wak pero e videonan aki ta visibel despues ku Google a kontrolá i evaluá esakinan. Pa por aktivá e opshon di ‘restricted mode’ of ‘beperkte modus’, bo mester tin un asina yama ‘Google account’ i un kuenta di YouTube. Bai den ‘settings/ instellingen’ i aktivá e opshon aki.
Kita opshon di Auto Play
Despues di a kaba di wak un video riba YouTube, un otro video por kuminsá sin ku abo mes a skohe pa wak esaki. Esei por sosodé debí na e opshon di ‘Auto Play’. Na momento ku bo tin e opshon aki aktivá, bo mester pone èkstra atenshon na loke bo yu ta wak i kua video lo bini despues di esun ku ta wak. Pa evitá esaki, ta konsehabel pa desaktivá e opshon aki.
Google Family Link
Tira un bista riba tur e opshonnan ku ‘Google Family Link’ por ofresé na abo i bo famia. Un di nan ta por ehèmpel ku dor di krea un ‘Family Link’ bo prohibí bo yu di subi e YouTube normal i vigilá ki tipo di video e ta wak via di bo ‘account’.
Ta hopi importante pa forma parti di bo yu su edukashon. No djis dun’e un tablet òf telefòn djis pa e stòp di yora òf pa e por ta ‘rustig’. Dediká tempu na dje i krea momentunan memorabel, hasiendo uzo di e plataforma di YouTube.