KOMPARÁ I KUMPRA
Bo tabata sa ku YouTube ta e plataforma di video mas grandi riba internèt? Ku miónes di usuario, awendia e plataforma aki ta dispone di un variedat amplio di videonan ku diariamente ta keda mirá. Algun di e kategorianan di mas popular ta: ‘videoclips, tutorials, vlogs, product & service reviews, pranks & challenges, how to videos, educational videos’ etc. Pues djis pens’é, YouTube bo mihó amigu tin e!
Pero meskos ku den bida real, bo mihó amigu por ta bo pió enemigu, den e mundu sibernétiko esaki tambe por ta e kaso. YouTube aparte di ta kontené videonan inspirativo, edukativo i rekreativo, tambe e ta kontené videonan ku por tin efekto negativo riba nos muchanan. Naturalmente komo mayor bo no ke pa bo yu wak e videonan aki. Pero kon bo ta pèrkurá pa esaki no sosodé?
PROTEHÁ BO YU DI VIDEONAN RIBA YOUTUBE
YouTube Kids
Hopi di bo boso kisas ya a tende di e terminologia aki. YouTube Kids ta e vershon di mucha ku a keda kreá dor di Google (doño di YouTube) spesialmente pa muchanan di 4 aña bai ariba. E motibu dikon a krea esaki ta paso difísilmente bo por keda sin topa un video ku por tin efekto negativo riba e vershon normal di YouTube. Komo mayor bo mester paga bon tinu na e kontenido di video ku bo yu ta wak.
Awendia hopi mayor ta duna nan yu un tablet òf un telefòn selular pa asina e por wak YouTube. Paga bon tinu! Kòrda ku tur hende por pone video riba YouTube. A ser komprobá ku hendenan ku hende maligno ta probechá di uza títulonan manera Peppa Pig of Mickey Mouse pa videonan ku un otro kontenido. Pues, semper ta alerta na kiko bo yu ta wak riba e plataforma di YouTube. 'Download' YouTube Kids i tira un bista den tur e opshon di videonan ku tin riba dje.