Konsumidó Alertá Volumen 53 Februari 2020 | Page 6

E temporada di Karnaval aki ta unu aun mas spesial. Esaki debí ku nos ta selebrando e di 50 edishon di Karnaval Era Nobo. Pa por selebrá na un manera sano i responsabel, ‘Korps Politie Curaçao’ a lansa un kampaña informativo den kual ta informá i konsientisá nos karnavalistanan, tantu esnan den grupo komo esnan kantu di kaya, di nan komportashon pa ku e temporada aki. Esaki Fundashon pa Konsumidó ta aploudí e inisiativa pa informá, eduká i konsientisá nos pueblo riba e diferente aspektonan ku ta di gran importansia pa e temporada aki. Den e edishon di nos revista digital aki nos ta kompartí ku boso algun tep esensial pa por gosa di Karnaval 50 na un manera konsiente i responsabel.

Sigui tur òrdu i instrukshon di polis, pa nos por selebrá un karnaval felis.

Promé ku bo sali bo kas

Hasi un sondeo na kurpa di kas promé ku bo bai wak òf partisipá den karnaval. Paga stof i saka tur aparatonan elektróniko for di koriente. Pèrkurá pa tur bentana ta bon será i tur porta bon di lòk. Tene na kuenta ku si bo no sende bo lusnan pafó i bo regresá kas lat, bo kas lo keda suku i ku posibilidat pa malechornan drenta. Sòru semper pa bo telefòn di sufisiente karga, data i òf sèn riba dje pa asina fasilitá bo pa na momentu bo tin ku drenta den kontakto ku un otro persona.

Sali kas trempan

Pa por garantisá seguridat den tráfiko i pa tur kos kana ordená, Polis di Kòrsou, durante di e dianan di kada marcha lo sera algun kaya ku tin konekshon ku e ruta di karnaval. Pa loke ta trata marcha di tiner i marcha grandi, e kayanan lo wòrdu será den diferente fase. Tene na kuenta ku riba e dianan di e marchanan aki, e kayanan lo wòrdu será 1 ora delantá. Fase 1 ta krusada Winstonchurchillweg, Franklin Delano Rooseveltweg i Jannoordynweg. Tene na kuenta ku pa marcha grandi e Fase 1 aki lo wòrdu será 4 ora delantá.

Fase 2 ta trata van eyck van voorthuyzenweg direkshon di Roodeweg, Roodeweg te na e final di Breedestraat Otrobanda. Pa parada di tiner i despedida di gran marcha, fase 2 lo wòrdu será 1 ora despues ku e marcha sali. Pa marcha grandi dia 23 di febrüari, fase 2 lo wòrdu sera 3 ora DELANTA!

Durante Marcha di Karnaval

No stroba òf stanka e desaroyo di e marcha. No sinta òf kologá na ophetonan riba kaya, kual por ta peliger pa abo i esnan rondó di bo. Paga tinu bon! No pone muchanan sinta riba ‘dranghek’, esaki ta sumamente peligroso. Un petishon ta bai pa tambe pa no deshasí di barikadanan ku outoridat pone riba kaya. No tuma nada serka personanan deskonosí i sòru pa bo tin bista konstantemente riba bo kos di bebe durante e marcha di karnaval.

Konsumidó, ta bon pa bo sa ku niun komersiante no ta permití pa bende bebida alkohóliko na bòter òf bleki. Ban laga tur problema na kas pa bo por gosa na pas.