Kòrsou tambe ta tene kuenta ku peliger di e vírùs novel korona segun prekoushon di WHO
Kòrsou tambe ta tene kuenta ku peliger di e vírùs novel korona segun prekoushon di WHO
PROTEHÁ BO MES!
Dia 31 di desèmber 2019 ofisina di e Organisashon Mundial di Salú (WHO) na China a keda informá ku tin kasonan di pulmonia di orígen deskonosí detektá na Wuhan, provinsia di Hubei na China. Mientrastantu e kasonan a keda identifiká komo e vírùs novel korona (2019-nCoV) serka outoridatnan Chines dia 7 di yanüari 2020.
Organisashon Mundial di Salú (WHO) a aktivá e ret di monitoreo tantu regional i mundial i ta urgí tur pais pa ta alerta i tambe prepará. E síntomanan di e infekshon ta entre otro difikultat pa hala rosea, keintura, tosamentu, rosea kòrtiku/ problema pa hala rosea. Den kaso mas severo e infekshon por kousa pulmonia, por presentá un síndrome agudo i severo di kapasidat di respirashon, malfunshon di nir i hasta por ta kousa di morto.
Ainda no tin informashon konfirmá di kon e vírùs ta keda transmití. Tin informashon ku tin kaso di transmishon di hende pa hende. Tumando na kuenta ku e ta kousa infekshon respiratorio ta rekomendabel pa tuma medidanan di prekoushon pa redusí e riesgo manera e.o. laba man ku awa i habon ku frekuensia, evitá kontakto ku personanan ku tin un infekshon respiratorio. Pasaheronan ku síntoma di infekshon agudo respiratorio mester limitá kontakto ku otronan pa no pega nan, ora tosa òf nister tapa boka i nanishi ku lensu di papel i tira esaki den kos di sushi i no riba suela, laba man frekuentemente ku awa i habon i buska kuido médiko.
Kasonan reportá pa WHO ta indiká ku tin kasonan na China i a registrá unu na Thailand, Hapon i Korea. Tambe a registrá un promé kaso na Washington, Estados Unidos. Den kaso di tur e paisnan aki ta trata di un persona ku a bishitá China i a ser kontagiá aya.
Servisio di Salú Públiko (UO G&Gz) ta keda monitoriá i traha estrechamente ku outoridat i profeshonalnan den kuido i otro organisashonnan, pa ta alerta pa kualke kaso partikular.
KIKO TA PRESIS TA KORONA VIRUS?
Koronavirus ta un famia di vírus ku a ser deskubrí den dékada 60 per ku te ainda su orígen ta deskonosí. E diferente tiponan ku tin di e vírùs aki, ta provoká diferente enfermedatnan, fo’i un simpel ferkout te un síndrome respiratorio grave ( neumonía).
Gran mayoria di e koronavirusnan no ta peligroso y por ser tratá di forma efikas. De hecho, gran mayoria di personanan na algun momento den bida ta kontraé un forma di koronavirus, generalmente durante infansia.