IMPOSIBEL
Últimamente Fundashon pa Konsumidó ta risibí diferente keho i pregunta di konsumidónan tokante kon komèrsio ta bai òm, i mag bai òm ku datonan personal i informashon ku un negoshi tin di e kliente bou di su maneho. Kasonan di personal ku ta risibí mensahenan di propaganda via SMS sin a duna pèrmit pa esaki via su number di telefòn, òf instansianan ku ta duna fiansa ku ta publiká nòmber i datonan di su klientenan sin mas, via un terser kompania den korant, sugeriendo ku e klientenan tin debe habrí na un otro negoshi.
Saliendo for di e punto di bista komun i simpel, kualke hende kuerdo lo bisa ku tipo di práktikanan aki no ta kontribuí positivamente na e relashon di konfiansa entre e negoshi i su kliente. Pero lei tambe ta protehá e konsumidó pa ku tipo di aktonan aki. I un lei ku a keda traha spesialmente pa e meta aki ta e Lei di Protekshon di datonan Personal.
Kiko protekshon di datonan personal por nifiká pa e konsumidó?
Na aña 2010 (P.B. 2010 no. 84) i 2013 (P.B. 2013, no. 92) gobièrnu a bini ku un lei spesífiko pa protehá datonan personal di siudadanonan. E ordenansa di lei aki ta basá riba e derechi di privasidat ku ta ankrá den nos areglo di estado i den otro tratadonan di derechinan humano ku Reino Hulandes (i Kòrsou tambe) ta mará na dje. E lei Protekshon Datonan Personal ta kontené reglanan ku ta brinda un protekshon struktural na e siudadano pa ku e prosesamentu di datonan personal. Instansianan gubernamental i kompanianan ku ta manehá i prosesá datonan personal di nos mester kumpli ku e lei aki. Esaki tambe mester ta e kaso si un konsumidó su datonan personal wòrdu prosesá, por ehèmpel ora e sera un kontrakt di telefòn, hasi un fiansa òf simplemente registrá pa un karchi di loyalidat pa spar punto na un negoshi. Lamentablemente e Kolegio di Supervishon ku a base di lei aki mester a keda instalá ainda no a keda instituí. Laga nos purba splika tòg kon e lei aki ta protehá abo komo konsumidó.
Kondishonnan
Konforme e lei aki, prosesamentu di datonan personal a base di religion, rasa, bida seksual òf otro base en prinsipio ta prohibí. Sinembargo, por prosesá dato a base di e puntonan aki basta ku e kompania tin un meta bon deliniá i hustu pa hasi esaki. Datonan personal ta datonan ku por yuda identifiká un konsumidó manera nòmber i fecha di nasementu.
Medida
Ora e ordenansa di lei aki drenta na vigor, e persona òf kompania wòrdu pone responsabel pa prosesamentu di datonan personal. Den kuadro di esaki e mester tuma medidanan tékniko i organisatorio pa evitá
ku datonan personal ta pèrdè òf wòrdu
malusá. Si un konsumidó òf kliente
kuminsá duda òf tuma nota di esaki,
e por pidi e kompania informashon òf
aserka e Kolegio ku un keho.