Despues di warda hopi aña porfin ta asina leu, nos hòspital nobo tei: Curaçao Medical Center. Un hòspital state-of-the-art ku un kuido médiko spesialisá i amplio.
Fundashon pa Konsumidó ta sumamente kontentu ku e desaroyo aki mirando kuantu benefisio adishonal e konsumidó por disfrutá di dje.
Pa loke ta trata kuido di pashènt, esaki den Curaçao Medical Center ta sentral i koordiná. Kual ta nifiká ku tur aktividat den e hòspital ta konektá na otro pa kual motibu e pashènt ta haña un kuido optimal i integral. Di e forma akí ta krea espasio pa apliká alternativa konfiabel i medisina adishonal tambe. Dor di esaki Curaçao Medical Center ta e ofresedó di mas importante di tantu kuido médiko spesialisá komo kuido klíniko altu na Kòrsou.
Loke nos di Fundashon pa Konsumidó ta aploudí aun mas, ta echo ku CMC lo traha di forma sostenibel, kumpliendo asina ku e eksigensianan internashonal di kalidat i normanan di seguridat. Esaki ta nifiká ku e pashèntnan i seguridat ta pará sentral for di un posishon finansiero saludabel kual ta nifiká tambe ku CMC lo ta aportando aktivamente na kontinuashon di desaroyo di Kòrsou.
Den e hòspital nobo e parti logístiko ta di gran balor. Nan lo traha ku ruta pa asina hasi e proseso pa bo por yega na un departamento mas fásil. Si dado kaso bo bishitá hòspital pa un tratamentu òf pa un atmishon e ora ei bo mester sigui un ruta pa por yega na bo departamento.
Tambe nos hospital nobo lo tin estrecho koperashon ku Advent Hospitaal pa asina ofresé e komunidat di Kòrsou un pakete kompletu di kuido médiko spesialisá. Ademas Curaçao Medical Center tin un aliansa ku sentro médiko universitario, entre nan e Universitair Medisch Centrum Groningen i Erasmus Universitair Medisch Centrum na Hulanda i tambe ku e Fundación Cardioinfantil na Bogotá, Colombia.
CMC su lema ta: “ Ku amor i rèspèt nos ta traha huntu na rekuperashon, mantenshon i fortifikashon di e kalidat di bida di nos pashèntnan.”
Kòrsou Pabien! Hospital nobo tei!