MIGRAINE
Ata'ki 10 solushon natural pa kombati'é....
E ta un doló insoportabel, ku bo ta haña na un banda so di bo kabes. Dòkternan no sa ku eksaktitut kiko ta e motibunan ku ta kousa migraine. Migraine ta un kondishon di salú basta komun ku ta afektá aproksimadamente 1 di kada 5 hende muhé i aproksimadamente 1 di kada 15 hende hòmber. Tin hende ta haña migraine entre otro dor di preshon haltu, miéntras tin ta hañ’é otro dor di mal sirkulashon di sanger, sanger diki i òf di sanger ku ta kuaha.
Otro motibu ku un hende por haña migraine tambe dor di kome hopi kos ku no ta salú òf ta kontené hopi salu, manera por ehèmpel chips.
Di otro banda, strès, depreshon, eksitashon òf dor di un shòk por duna un hende migraine. Kousanan físiko tambe por ‘trigger’ migraine serka sierto hendenan. Por ehèmpel: dor di kansansio, falta di soño, tenshon na skouder i garganta, mal posishon i demasiado esfuerso físiko. Suku abou tambe por ‘trigger’ migraine.
Migraine por kousa un doló intensivo i tin diferente síntoma ta presentá ora bo tin esaki. Mariá, gana di arohá (saka) i bo ta bira hopi sensibel. Hopi hende ku tin migraine no por ku lus ni niun tipo di zonido, maske kon abou esaki ta. Ora bo tin doló intensivo kemen bo tin hopi doló te ku bo ta sinti ku bo sesu ta bati. Mayoria biaha ta na e momentunan di doló intensivo ei, e síntomanan di mareo, e gana di saka i bo sensibilidat ta presentá. Den mayoria kaso ora e parti di sakamentu tuma lugá, e doló ta kuminsá fria. Migraine por afektá bo rutina di dia masha hopi mes, dor ku ta un doló ku bo tin tur dia di nobo. E por dura oranan, dianan, simannan i asta lunanan pe bai. Sa pasa ku bo por haña migraine mas ku un riba un dia.
Kambia bo diet òf kustumber di kome
For di investigashon hasí a Sali na la, ku aparentemente doló di kabes i migraine ta un reakshon alérgiko ku bo ta haña riba sierto produktonan ku bo ta usa. Si bo tin doló di kabes tur dia, bo mester monitor tur kos ku bo ta konsumí i wak si tin un patronchi. E produktonan ku mas atenshon tin ku pone riba nan ta chukulati, keshi, salami, i tur produkto ku ta kontené aspartam. Alkohòl i kafeina tambe por kousa reakshonnan alérgiko, anto si bo hasi uzo di esakinan den kantidatnan grandi, e por kondusí na sekamentu. Doló di migraine ta fèrfelu pa lidia kuné. Un hende no ta para ketu i realisá kiko nan tur bo ta hasi i kome òf bebe ku ta kousante di bo migraine i tampoko kiko ta motibu dikon e migraine no ta kita.
Solushon natural kontra migraine
Banda di bishita un dòkter konvenshonal ku lo resitá bo algu kontra e doló di kabes intenso ei, bo por . buska solushonnan tambe den e huki di naturalesa. Tin produktonan natural ku por yuda den e momentonan fastioso ei.
1. "Te di Sitrun"
E bebementu di awa kayente ku un mitar lamunchi fresku primi den dje, no ta solamente pa esunnan ku ke drecha nan digestion òf pa pèrdè peso, e ta tambe bon pa konsekuensianan ku ta kondusí na doló di kabes. Sitrun tin karakterístikanan refreskante i relahante ku por baha e doló di kabes. Ounke e tin un smak zür,e ta yuda alkalisá e kurpa efektivamente.
2. Awa kayente
Ora e doló wòrdu okashoná pa strès, bo por hasi un esfuerso pa trat’é ku awa kayente. Drenta baño, habri kranchi, pone e temperatura na un temperatura konsiderabel, pero sòru pa e kayente ta aseptabel. Para bou di kranchi, dirigí e awa riba e parti patras di bo garganta. No ta solamente bo sirkulashon di sanger e ta drecha, sino e ta relahá e spirnan den lomba plùs skouder. Kasi mesora lo bo sinti un alivio.
3. Apel
Meskos ku sitrun e fruta aki tambe ta yuda p’abo keda ku e nivel di pH den bo kurpa. Tambe a keda demostrá ku e holó di apel bèrdè, por yuda remediá kontra migraine. Kome un mitar apel ora bo ta sinti ku e doló ta bin. Bebe un glas di awa despues, esei ta pa un mihó resultado i pa bo keda bon hidratá.