Den pasado, por ehèmpel, Fundashon pa Konsumidó a yega di haña diferente keho di studiantenan ku a djis bai un dia habrí, yena un formulario keriendo ku nan ta bai haña mas informashon i terminando marando nan mes na un inskripshon ku ta mara nan outomátikamente na debenan di estudio ku nan no tabata konsiente di e gastunan konserní.
Pa yuda e studiante lokal, den e edishon aki di Imposibel, Fundashon pa Konsumidó ke duna algun tep na nos hóbennan ku a disidí di keda Kòrsou i studia lokal, i ainda ta en buska di e estudio ideal pa nan sigui nan karera eskolar. Lógiko ku lo mas importante ta kiko ta e studiante su interes, ambishon i kapasidat. Pero kada un di e puntonan tratá ta di sumo importansia pa despues di bo eskoho bo no keda ku un sensashon amargo, di a invertí den bo mes i bo estudio pa despues esaki no a sali bo benefisioso.
ORIENTASHON
Manera ya bisa, mas importante ta pasa kiko bo ke i den kiko bo interesnan ta. Riba internèt bo por haña diferente tèst tokante bo personalidat, bo kompetensianan, bo estilo di studia, balornan propio, motivashon i ki sorto di trabou ta pas mihó ku bo. Enfin, tèstnan ku ta siña bo konosé bo mes i ta konsiente ki tipo di estudio ta pas mihó ku bo. Tin tambe organisashonnan ku ta ofresé e tèstnan aki di un manera profeshonal, ounke ku esnan riba internèt ya ta duna bo un bon impreshon di kua direkshon di estudio lo pas mihó serka bo.
PREIS
Un faktor hopi importante ta e preis di e estudio. Nos tur a mira i tende di kasonan di studiantenan ku a studia na Hulanda i a bin bèk Kòrsou i tur e problemanan ku nan tin pa ku paga bèk nan estudio. Tambe si bo keda studia na Kòrsou ta importante pa ta konsiente di tur e gastunan ku ta bin dilanti pa ku un estudio. Tene semper na mente ku no ta un aña so bo ta studia i ku bo debe ta keda akumulá durante bo estudio. P’esei, hasi algun ehersisio manera chèk si e estudio ta bin na remarke ba un beka di Stichting Studiecommissie Curaçao (SSC), sigurá bo mes di tur gastu anual di e estudio, inkluyendo gastunan eventual pa buki, pasa eksámen òf gastunan di atministrashon òf multanan pa si bo hasi pago lat.
AKREDITASHON
Un instituto por pidi su pèrmit, habri su portanan i ofresé estudio i kobra su studiantenan. Importante ta pa abo sa ku e diploma ku bo ta bai studia pe ta rekonosé pa gobièrnu i eventual tambe den eksterior. Averiguá esaki i pidi konfirmashon di esaki por eskrito pa asina bo ta garantisá ku ora bo hal bo diploma esaki ta unu ku bo por traha kuné tur kaminda. Tuma kontakto ku Ministerio di Enseñansa, Siensia, Kultura & Deporte pa mas informashon pa ku akreditashon di bo estudio.
KONDISHONNAN
Manera e ehèmpel ku ya nos a duna, tuma semper nota di tur e kondishonnan ku e instituto tin pa drenta den un ‘areglo di estudio’. Pasombra, ta un kontrakt bo ta firma ora bo kuminsá un estudio. Kontrolá i wak tur kos ku bo ta firma. Bisa ku bo ke bai kas ku e formulario i laga bo mayornan lesa esaki si algu no ta kla. Pidi semper pa e Kondishonnan General di e instituto, lesa esaki. Si tin posibilidat di paga bo estudio den mas ku un término, wak bou di kua kondishon esaki ta pasa i kiko ta e konsekuensianan si abo di bo parti no por kumpli. Fundashon pa Konsumidó semper tei i ta dispuesto pa yuda ku preguntanan di nos studiantenan. Un studiante tambe ta un konsumidó!