Mester bisa ku hopi bia aktitut di kompanianan di seguro ta resultá remarkabel i te asta inhustu pa ku aseguradonan. Nos a bin ta tende serka klientenan ku pa kasonan hopi simpel, lógiko i fásil, kompanianan di seguro a bin ta asumí posishon di no ke kumpli ku nan deber di pago pa ku nan kliente. Asta sa yega asina leu, ku e kliente mester bai korte pa haña ku e kompania ta paga.
Asina a sosodé tambe den un kaso di un aseguradó ku tabata sigurá ‘allrisk’ na kompania di seguro ‘N’. A pasa ku yu di e asegurado a fia outo di su mama i miéntras ku e tabata manehá esaki mardugá riba Caracasbaaiweg, un otro vehíkulo a bula sali su dilanti. Pa evitá e choke, e hóben a desviá i pèrdè kòntròl riba e stür i bai resultá den kura di un kas di famia. Apesar ku e aseguradó tabata sigurá ‘all risk’ o sea WA plùs Casco, e kompania di seguro a ninga di kubri e daño, pa motibu ku segun e kompania di seguro rumornan i/òf CRS lo a duna di konosé ku e shofùr lo tabata hunga pusta i/òf tabata koriendo pa loko.
Esaki a buta ku e aseguradó a hañ’e obligá ta akudí na Korte, mirando ku e no por a sali afó ku su kompania di seguro. Durante di e kaso, representante i abogado di e kompania di seguro a bolbe trese pa dilanti ku lo tabatin pustamentu i/òf korementu di forma deskabeyá. Mas aleu nan a trese pa dilanti ku no tabatin nesesidat pa kuminsá un huisio sumario mirando ku e aseguradó lo no tabatin urgensia pa un desishon di wes. Esaki apesar ku e kompania di seguro no a ni ofresé un vehíkulo di hür na su kliente, siendo un persona ku ta traha den benta riba kaya i den nesesidat urgente di un vehíkulo pa por ehersé su labor.
Abogado di e aseguradó a sa di desbaratá tur e argumentonan di e kompania di seguro i finalmente konvensé wes di e inhustisia ku a ser hasí kontra di su kliente. Esaki a hiba wes na sentensiá e kompania di seguro na paga un montante di kasi 30.000,- na e aseguradó, mas gastunan di Korte i di abogado. Por konkluí finalmente, ku e kaso lo no mester a yega asina leu, si kompania di seguro ‘N’ lo a dil mihó ku su kliente en bes di a basa su mes sin mas riba un rapòrt di CRS so. E kaso aki por sirbi komo ehèmpel pa otro kompanianan di seguro tambe.
Konsumidó ta gana kaso kontra di konosidó kompania di seguro
Artíkulo kortesia di abogado
Mr. R. Conquet
RC LEGAL
Mahaaiweg no. 9A
5270622-7880151
Artíkulo kortesia di abogado
Mr. A.V.G. Rooijer,