Un di e vishonnan di Fundashon pa Konsumidó ta pa konsumidónan di Kòrsou ta konsiente i krítiko di nan situashon finansiero. I pa hopi aña nos duna kontenido na e vishon aki pa medio di nos kursonan di presupuesto grátis ku tur aña nos ta organisá. Meta ta pa hasi edukashon finansiero parti integral di nos sistema di edukashon pa asina nos ta konsiente i ta doño di nos pòtmòni.
Pues na momentu ku Fundashon pa Konsumidó a keda aserká pa e organisashon Finansa Hubenil pa koperá i kolaborá den e proyekto dirigí riba mucha i hóben di 8 pa 12 aña.E workshop ta siña nos muchanan di un forma interaktivo pa manehá sèn for di yòn. De e workshop e temanan Trabou, Gasta responsabel, Spar i Kompartí ta keda tratá.
De e tarea Trabou e muchanan ta siña pa kue job pa asina yega na entrada. Yuda mayornan ku tareanan den kas i kobra un sèn palabrá ku bo mayornan. Hopi importante ta pa siña pues ku ta ku solamente ku trabou bo por yega na plaka. Tambe bo ta siña traha un presupuesto di bo entrada i tin un bon bista di kiko bo tin den bo saku.
Gasta responsabel ta un parti esensial di e workshop. Aki e mucha ta siña kon pa manehá loke e ta saka na sèn. Tres ènvelòp, un pa gasta, un pa spar i un pa duna pa asina e mucha siña tin kontrol riba partinan di su entrada. Kada ènvelòp tin su meta i no por saka sèn for di unu pa hasi otro.
Ku Spar bo ta siña tene pasenshi i ta konsiente ku sparmentu ta algu ku ta tuma su tempu. Siña un mucha spar su sèn, sigur si ta sèn ku e mes a traha pe, lo siña bo pa na grandi spar en bes di fia. Spar pa logra bo meta ta difísil, pero trabou duru ta paga.
Duna ta e parti den kua e mucha ta siña ser generoso i kompartí algu di loke e tin. Pensa riba otronan ku no tin i ta konsiente ku ta bon pa duna i yuda otro. I sigur si bo tene esaki tambe den bo presupuesto semper lo bo ta den posishon pa duna un man na otro ora ta nesesario.
Fundashon pa Konsumidó ku inmenso plaser a kontribuí i patrosiná e workshopnan aki. Mirando e proyekto un ekstenshon di nos vishon i meta ariba menshoná. Resientemente un grupo di 20 mucha a partisipá na e workshop aki ki a terminá ku entrega di sertifikado na tur e hóben kursistanan. Den futuro nos lo keda apoyá proyektonan asin’aki. Al final edukashon finansiero mester ta algu plantá i ankrá den nos komunidat i ku un base sólido den nos enseñansa.
FINANSA HUBENIL
Workshop pa mucha.....
KLEK AKI!