Si nos hasi un análisis di bùndelnan i tarifanan postpago nos por konstatá ku tantu UTS komo Digicel ta ofresé paketenan ku un kantidat di minüt di yamada i tambe SMS. Minütnan den e pakete di tur dos kompania ta bálido pa yamadanan lokal durante di hinter dia. Den e pakete di UTS tambe ta inkluí yamadanan pa paisnan den Chippieland (Kòrsou, Boneiru, Saba, Sürnam, St. Eustatius, St. Maarten i St. Kitts & Nevis), Hulanda i Merka. Digicel ta ofresé den su paketenan un bùndel adishonal ku ta bálido solamente pa yamadanan di Digicel pa Digicel den e orario di 9 or di anochi te 7 or di mainta. Tarifanan di Digicel ta inkluí OB i esnan di UTS ta ekskluso OB.
Si nos hasi un kalkulashon di preis di bùndel pa minüt di yamada nos por konkluí ku serka tur dos kompania, mas karu e pakete postpago ta, mas barata yamadanan ta bira pa minüt. E pakete di mas barata di UTS, Chippie 20 ta kosta pa yamada fl. 0,44 i esun di mas barata di Digicel, Digicel Double Value 60 ta kosta fl. 0,50 pa minüt. Tene na kuenta si ku e paketenan di Digicel ta duna e bùndel adishonal grátis den kua den e kaso aki bo por yama 60 minüt adishonal solamente na numbernan di Digicel den orario di 9 or di anochi te 7 or di mainta.
Digicel i UTS ta ofresé paketenan di data prepago na nan klientenan. Ku e paketenan aki konsumidónan por hasi uzo di internèt, pa manda i risibí mail i subi wèpsaitnan di medionan sosial. Paketenan ta varia di durashon di tempu i kantidat di data ku e kliente ta risibí. Si nos analisá e dataplannan a base di e preis ku bo ta paga pa e kantidat di data (MB) i e dianan ku bo por hasi uzo di e dataplan, nos por konkluí ku e preis pa MB no ta varia hopi entre e dos kompanianan i e paketenan (di fl. 0,03 te fl. 0,05 pa MB). Di otro un banda si nos wak loke bo ta paga pa dia pa haña akseso na internèt, e pakete 4G+ Chippie Standaard ta esun di mas barata na balor di fl. 1,63 pa dia di uzo, sigui pa Digital Data Bronze di Digicel (fl. 1,67 pa dia). E dataplan di UTS ta terminá asina bo usa e kantidat di data ku bo a kumpra. Na Digicel e dataplan ta keda aktivo i pa kada MB ku bo usa fl. 0,30 ta keda dedusí for di e saldo prepago ku bo tin riba bo telefon.
Tur e datonan di e komparashon ta keda ilustrá den e tabelnan aki bou. Por pidi e tabelnan tambe via mail na: [email protected] òf por tuma kontakto ku nos via nos number di telefòn 462-6666.
ipad keyboard
tarifa postpago
tarifa data