Ora bo kumpra un produkto, bo tin derechi riba un bon produkto! Esaki no ta konta pa solamente produktonan ku ta bini ku un garantia di e komersiante òf fábrika, pero tambe pa produktonan sin garantia òf produktonan ku nan garantia a pasa kaba!
Ki ora nos ta papia di un bon produkto?
Un bon produkto nos por definí di e siguiente forma: un produkto ku ta bai un sierto tempu ora bo us’é na un manera normal.
Lokual bo por spera di un produkto ta dependé por ehèmpel di:
- e sorto di produkto (nobo òf segunda mano);
- e marka;
- e preis;
- e tipo di negoshi kaminda bo a kumpra e produkto;
- lokual e negoshante òf fabrikante a bisa bo;
- lokual a wòrdu bisá den propaganda pa e produkto.
Kon largu bo por usa un produkto sin problema ta dependé pues di kada produkto. Tin biaha e negoshante mes ta duna e informashon aki. E por bisa bo por ehèmpel ku bo por usa su produkto 3 aña i despues lo bo tin ku kumpra un otro. Ora bo ta bai kumpra un produkto, puntra e negoshante òf e fabrikante kon largu bo por usa e produkto promé ku e stòp di funshoná!
Ehèmpel: Kiko bo por spera di un produkto?
Bo a kumpra un djèket pa ANG. 1000,- den un pakus karu. Bo por spera mas di e djèket aki ku un djèket ku bo kumpra na un pakus barata pa ANG. 50,-. Si e negoshante bisabo ku e djèket aki ta wanta awa, bo por tene e negoshante na esaki tambe. Sinembargo tur djèket ta gasta despues di un tempu ku bo us’é. Pa esaki si e komersiante no ta responsabel!
Reparashon grátis òf un produkto nobo
Kiko awor si e produkto ku bo a kumpra no ta bon? Por ehèmpel: bo a kumpra un sapatu ku den 1 siman a kibra.
Punto di salida ta ku bo tin derechi riba reparashon grátis òf un produkto nobo. E negoshante mester sòru pa esaki! E mester hasi esaki sin ku abo ta sinti muchu molèster di esaki i e no tin mag di dura muchu largu.
DERECHI I DEBER