KOMPARÁ I KUMPRA
Awendia un bon ‘Smartphone’ no nesesariamente mester ta karu.
Aki nos ta duna bo 5 telefònnan ekonómiko, ku fásilmente ta pas
den bo presupuesto debí ku esakinan no ta mas karu ku fl. 650.
Fakansi grandi ta yegando su final, kual ta nifiká ku un aña eskolar nobo ta aserkando. Esaki ta trese un sintimentu di emoshon i alegria serka mayor i hóbennan. Pero pa straño ku por parse, hopi mayor ta warda na último momento pa hasi kompra di ‘Back to School’. Komo si fuera ta awe nan a haña sa ku un aña eskolar ta bai kuminsá. Un kore kore, paso e yu no a haña e kèts ku e gusta na su sais , materialnan di skol ta karu i ainda no a kumpra unifòrm di skol. P’esei Fundashon pa Konsumidó ta duna bo algun tep, pa asina hasi e temporada di ‘Back to School’ aki unu mas plasentero i relahante.
Lista di artíkulo pa skol
Ta importante pa bo hasi un análisis di kiko bo tin ku kumpra, unda bo ta bai kumpra i kuantu plaka bo tin presupuestá pa saka. Awendia skolnan ta repartí un lista di artíkulonan di skol ku e yu mester di dje durante e aña eskolar. E lista aki lo yuda bo den e proseso di kompra di “Back to School”. Algun konsumidó a kompartí nan eksperensia ku nos i a duna di konosé ku no nesesariamente e hóben ta hasi uzo di tur e artíkulonan aki. P'esei Fundashon pa Konsumidó ta konsehá pa inventarisá kiko e yu a sobra di aña eskolar pasá. Esaki ta den bon estado?
Skrap e mesora for di bo lista di kompra i asina evitá di saka sèn na e artíkulo ei.
Bo presupuesto
Un di e erornan di mas grandi ku mayoria konsumidó ta kometé, ta di warda na último momento pa hasi kompra di “Back to School”. Hopi bia bo ta tende ku no tin variashon amplio di material pa skol, unifòrm pa skol ta karu... enfin. Un kantidat di kos. Dikon nos no ta spar un tiki, un tiki tur luna? Ta hopi importante pa komo mayor konsiente i responsabel, premirá gastunan adelantá. Traha un presupuesto realístiko di bo situashon finansiero. Psst, mama òf tata... Nos tur ke duna nos yunan lo máksimo. Pa nan ta felis i kontentu, prinsipalmente den e temporada aki. Pero si e pòtmòni no ta duna pa kumpra p.e. e kèts karu ku nan ta deseá, ser honesto ku nan i duna nan un splikashon dikon bo no por ‘afford’ e na e momentu aki. Komunikashon te yabi!
BACK TO SCHOOL