Artíkulo kortesia di abogado
Mr. R. Conquet
Artíkulo kortesia di abogado
Mr. A.V.G. Rooijer,
Sa sosodé ku institutonan privá di estudio ta pone den nan kondishonnan i akuerdonan un klóusula ku ta bisa ku e studiante mester paga e suma di e kurso òf estudio kompleto den kaso ku si e studiante terminá e kurso òf estudio promé ku tempu òf ku e studiante no ta haña e sèn bek ku e la paga pa e kurso òf estudio, e asina yama klóusula di anulashon di e estudio òf kurso. Den mayoria kaso e tipo di klóusulanan aki ta pa protehá e instituto ya komo ku na komienso di e kurso òf estudio nan tin ku hasi gastunan adelantá na lokalidat, dosente, literatura i otro material di estudio pa por duna e estudio òf kurso. E sèn ku e studiante òf kursista ta paga, ta pa yuda kubri e gastunan menshoná.
Pero e kursista òf studiante sa bin hañ’é den situashonnan ku ta pone ku e no por sigui e kurso òf estudio mas i mester stòp promé ku e kaba e kurso òf estudio. Hopi biaha e kursista òf studiante ta purba pa haña su sèn ku e la paga pa e estudio òf kurso bek, pero mirando e klóusula di anulashon di estudio òf kurso, e no ta haña nada bek. Aplikando e klóusula di anulashon di estudio òf kurso, e instituto sa pone e studiante òf kursista paga tambe pa e estudio òf kurso kompleto, no opstante ku e studiante òf kursista a anulá e estudio òf kurso.
Korte di Kasashon na Hulanda, den un veredikto di 27 òktober 2017 (ECLI:NL:HR:2017:2775) e ta husga ku un akuerdo di estudio òf kurso ta un akuerdo di enkargo (opdrachtovereenkomst) i ku e reglanan tokante ‘opdracht’ manera regla den kódigo sivil di Kòrsou den buki 7 ta aplikabel riba e akuerdo di estudio òf kurso. Artíkulo 408 di buki 7
ta duna e studiante òf kursista e posibilidat pa terminá e akuerdo di estudio òf kurso na kualke momento.
Sin embargo, dor di e klóusula di anulashon di estudio òf kurso, ku por trese ku n’e gastunan kuantioso pa e studiante òf kursista, òf den sierto kasonan e no ta haña nada di sèn bek, esaki ta impedí e studiante òf kursista defakto pa terminá e estudio òf kurso. Esaki ta hasi e klóusula di anulashon un klóusula no rasonabel (onredelijk bezwarend), lokual ta sanshonabel.
Esaki tin komo konsekuensia ku e tipo di klóusulanan di anulashon aki, ku ta trese un peso finansiero grandi pa e studiante òf kursista, no por keda para, di moda ku e instituto di estudio òf kurso mester duna e studiante òf kursista parti di e sèn ku e la paga pa e estudio òf kurso bek. Tambe e instituto no por mantené e studiante òf kursista pa paga e suma kompletu di e estudio òf kurso, den kaso ku e studiante òf kursista terminá e estudio òf kurso promé ku tempu.
Mirando e aña eskolar nobo ku ta na kaminda, den kua hopi studiante ta kuminsá estudio òf kurso nobo, ta rekomendabel pa skrudiñá e akuerdo di estudio i e kondishonnan general bon òf buska konseho promé ku firma. Si topa un akuerdo di anulashon, e studiante òf kursista por pidi pa saka esaki for di e akuerdo òf pa adaptá esaki teniendo kuenta ku e desishon di Korte di Kasashon di Hulanda.