Editorial
Subida di Prima
di Seguro Obligatorio
EDITORIAL
E echo ku barkunan di fruta no ta yega mas for di Venezuela a pone ku último dianan nos konsumidónan a bini ta eksperensiá un bahada di oferta di fruta i bèrdura aki na Kòrsou i tambe un subida di preis di algun fruta i berdura na sierto establesimentunan. Sirkunstansianan asina aki, riba kualke merkado ta krea espasio pa komersiantenan hasi mal uso di e situashon di posibel skarsedat i spekulá ku preis di sierto produkto.
Pa kontrarestá eventual aktonan asina i tambe pa garantisá akseso na alimentashon sano pa hinter nos komunidat gobièrnu di Kòrsou a instituí e asina yamá Makutu Básiko. Meta di Makutu básiko ta pa brinda nos komunidat produktonan di promé nesesidat na un preis pagabel. Na 2011 a adaptá e Makutu Básiko añadiendo na e makutu e siguiente 10 fruta i 10 berdura: drùif, mango, patia, apel, apelsina, mandarein, bakoba, milon, banana, papaya, blachi di salada, kolo (tambe di dipfris), tomati, awakati, promentòn, pampuna, bròkoli (tambe di dipfris), spinazi (tambe di dipfris), siboyo i wòrtel.
Huntu ku esaki tambe a kambia e sistema pa fiha preis di un sistema di preis fiho pa tur produkto igual, pa unu di márgen di ganashi máksimo. Si ántes e preis pa un bleki di lechi tabata meskos tur kaminda, ku e kambio aki kada establesimentu por tin un preis diferente kalkulá a base di e preis di importashon. Kòntròl di preisnan máksimo ta na enkargo di Inspekshon Ekonómiko, kual ta kontrolá si e preis den rèki ta kuadra ku e preis kalkulá. Ademas den lei ta stipulá ku gobièrnu tin e deber di publiká tur kambio di preis di produktonan di Makutu Básiko.
Debí na e bahada di oferta i tambe e subida di preis di algun fruta i berdura manera banana, awakati i patia na sierto establesimentunan, Fundashon pa Konsumidó djabièrnè último a manda un karta pa Minister Steven Martina. Den e karta aki nos ta pidi Minister pa splika nos konsumidónan kon bin preisnan di sierto fruta i berdura a subi òf ta hopi haltu, prinsipalmente si esakinan ta fruta i berduranan ku ta regulá dor di gobièrnu. Tambe nos a puntra si a (laga) hasi un investigashon pa determiná si e preisnan ta kuadra ku e fórmula di márgen di ganashi máksimo.
Fundashon pa Konsumidó ta di opinion ku e investigashon aki ta nesesario pa asina deskartá tur spekulashon i garantisá komunidat ku e preis ku e ta paga ta un preis hustu, den e márgen di ganashi manera lei ta preskribí. Tambe Fundashon pa Konsumidó lo ke mira un publikashon di Gobièrnu den kual komunidat por mira si di bèrdat preisnan aktual di fruta i berdura ta kalkulá konforme preskripshonnan vigente.
Transparensia so por trese klaridat, trankilidat i konfiansa bèk serka nos konsumidónan.
Marc Marshall
FRUTA I BERDURA
TA DEN MAKUTU BASIKO
TA DEN MAKUTU BASIKO
FRUTA I BERDURA
Direktor