UN KOMBINASHON KU TA BAL
?
?
Den tur sentido, keda sin bebe alkohòl ta hopi mas mihó ku bebe alkohòl maske ta un tiki. Semper tin riesgo mará na bebementu di alkohòl. Aunke bo no ta kere. Bebementu di un tiki alkohòl ku regularidat, ku tempu por bira un kustumber, anto pa evitá ku kustumber ta bira lei, ta bon pa bo ta kosiente riba e kantidat di alkohòl ku bo ta bebe.
Esaki ta konta spesialmente pa hendenan ku ta bebe pa motibu di strès, depreshon òf kualke otro situashon den kual bo por pensa ku alkohòl ta e solushon. Tambe tin e hendenan ku tin bebementu den famia. Por ehèmpel: Wela/tawela ta bebe, mama i/òf tata, tanta/tio tambe ta sigui ku e bebementu paso nan a lanta ta mira nan grandinan ta hasié, yu, prima/o tambe ta kuminsá bebe i asina e ta sigui di generashon pa generashon.
Tin hopi hende ta kere ku bebementu di un tiki alkohòl ta bon pa nan salú. Pero e supuesto positivismo di alkohòl no ta bal mas, ku e riesgo ku por presentá despues. Un parti ta bèrdat, pero e ta konta solamente pa hende muhé i hòmber riba 40 aña ku ta saludabel, aunke pa nan tambe ta konta ku kome saludabel i variá, hasi ehersisio frekuentemente i no huma, ta un alternativa muchu mas mihó ku e bebementu di alkohòl. Di otro banda tin hopi hende tambe ku ta bebe pasobra nan ta haña e ta dushi i agradabel. Nada malu den esei. Pero tene kuenta ku konsumimentu di alkohòl na gran eskala por trese kosnan ferfelu kuné: aksidente den tráfiko i/o na trabou, problemanan den kas i komportashonnan agresivo/ bringamentu/ diskushon. Den un palabra bisá tur e situashonnan ku por pone abo i/o otro hende su bida i salú na peliger.
Diferente síntomanan i efektonan di alkohòl
E promé kehonan físiko ta ku bo por kuminsá sintibo mas kansá ku normal, bo ta drumi malu i bo por haña doló di stoma. Bo kurpa kompletu ta keda afektá pa e konsumo eksesivo di alkohòl. E promé kaminda ku e alkohòl ku bo a bebe ta pasa ta den bo slòkdarm. Di ei e ta bai den bo stoma i dunnedarm. Despues e ta plama den bo kurpa via bo sanger. Manera ku e alkohòl yega na bo mente (esaki ta sosodé den 10 minüt) bo ta kuminsá sintibo mariá. Despues di un par di glas di alkohòl, mayoria hende ta bira kontentu, nan ta kuminsá papia di mas òf hari duru. Alkohòl ta dof mente di hende. E konsekuensha ku e ta trese kuné ora bo mente ta di dof ta ku bo ta bira slow kemen bo no por reakshoná mes lihé mas, bo no ta mira òf sa loke ta sosodé rondó di bo i bo por papia kos ku bo no mester papia. Si bo bebe di mas alkohòl (20 à 25 glas) den un lapso di tempu hopi kòrtiku, bo tin hopi chèns di keda inkonsiente, tambe bo por haña dañonan ku ta mará na tempu largu por ehèmpel daño selebral. I esaki por kondusí despues ku bo por haña problema ku bo memoria/ demensia. Otro kos ku por pasa ta ku bo por haña ataka di kurason òf bo ta stòp di hala rosea.
Otro órgano ku alkohòl por afektá ta bo igra. Bo igra tei pa saka supstansianan straño i venenoso for di bo kurpa. Mas malu e sustansia ta, mas duru e mester traha. Anochi bo por bisa ta ora pa bo igra sosegá. Pa saka 1 glas di alkohòl for di bo kurpa ta dura 1 ora pa 1 ora i mei. Por ehèmpel si bo bebe 4 glas di alkohòl bo igra ta dura 4 pa ora pa saka tur e alkohòl for di bo kurpa. Mainta ainda lo bo por ta sinti e efektonan di e alkohòl ku bo a bebe e dia promé. E proseso di saka alkohòl for di bo sistema no por wòrdu alterá/ manipulá. Loke ta wòrdu bisá pa bebe kòfi, dal un baño friu, arohamentu, kome algu pa chupa e alkohòl, dal un Bloody Mary etc, den realidat e no ta yuda. Despues di tempu di hopi maltrato, bo igra por asta stòp di funshoná te ku mester remplas’é.
BO SALÚ I ALKOHÒL