aecenas korte di
Hopi di nos konsumidónan a yega di pasa den un situashon kaminda nos ta kumpra un produkto òf servisio di kua nos no ta satisfecho. Sea ta e aparato ta daña òf e no ta hasi loke bo a spera na momentu ku a saka bo plaka pa kumpr’é. Òf simplemente bisá e loke bo a kumpra no ta konforme loke bo a spera.
Fundashon pa Konsumidó ta yuda intermediá entre nos konsumidónan i komersiantenan na momentu ku nos risibí un tipo di keho asin’aki. Esaki nos ta hasi tumando kontakto ku e kompania i mustrando riba e deber pa lei di kada komersiante di ta para tras di loke e ta bende i duna e kliente loke e tin derechi riba dje. Sea ta drecha, kambia òf duna kliente su sèn bèk.
Den kasonan kaminda e komersiante no ta dispuesto di koperá i kumpli ku su deber, na Kòrsou no tin un instansia ku e konsumidó por aserká pa imponé riba e kompania su derechi ku pa lei e tin. Ta p’esei Fundashon pa Konsumidó pa mas ku 10 aña ta trahando i buskando maneranan pa yega na un manera pagabel i aksesibel pa kada konsumidó por ehersé su derechinan. E trayekto largu aki a kulminá den luna di febrüari 2014 den un konsepto di lei ku Fundashon pa Konsumidó a manda pa Ministernan konserní, Kámara di Komersio, VBC, Órden di Abogadonan i Parlamento di Kòrsou.
Kon e Korte di Konsumidó lo bai traha?
Un persona natural ku a kumpra un produkto òf servisio pa uso personal por aserká nos fundashon pa intermediá den un keho si a kaso e no por yega na un areglo ku un kompania tokante di su keho. Fundashon pa Konsumidó lo aserká e kompania representando e kliente pa yega na un areglo satisfaktorio. Den kaso ku no bini un solushon satisfaktorio pa e keho e kliente, asistí pa nos fundashon por hiba su kaso dilanti di korte pa eksigí i imponé loke e ta deseá pa e kompania hasi. Si nos kompará e proseso aki ku esun ya eksistente, e benefisionan pa e konsumidó lo ta ku e tin ménos gastu pa hiba su gastu dilanti: e gastunan di e prosedura na Korte lo ta fiho i pagabel i e konsumidó lo no tin mester di un abogado ku tambe ta un gastu riba su mes. Si por ehèmpel bo a kumpra un radio di fl. 200,= i esaki daña despues di dos dia i e komersiante ta alegá ku e no ta duna garantia (loke pa lei no tin mag) un konsumidó lo hiba un kaso asina mas lihé dilanti di e Korte di Konsumidó ku na momentu ku e mester buska i paga un abogado ku lo a salié por ta mas ku e suma inisial di e kompra di e radio.
Nos ta premirá ku e konsekuensha di e proseso esaki lo ta ku komersiantenan lo ta hopi mas habrí pa trata kehonan di nos konsumidónan. Kada keho ku bai dilanti lo nifiká gastu èkstra pa e komersiante. E lo ta hopi mas dispuesto pa tuma kehonan di su klientenan na serio i trata esakinan na un manera mas agradabel pa e konsumidó.
konsumidó
AKTUALIDAT
Ya pa hopi tempu Fundashon pa Konsumidó ta bringando pa na Kòrsou nos yega na un Korte di Konsumidó. Entretantu, huntu ku Prof. Jan de Boer nos a prepará un Konsepto di Lei ku ya a keda mandá pa tur e asina yamá “stakeholdernan” pa asina krea un base komun riba kua por adaptá nos leinan pa yega na e prosedura aki.