E benifisionan di hasi
ehersisio
A yega ora pa bo kuminsá hasi mas ehersisio. Nos tur sa ku hasi ehersisio ta bon pa bo kurpa i salú, pero por ta ta posibel ku ainda abo no ta realisá kon bon esaki di bèrdat ta pa abo. Si bo ke biba mas largu, sintibo mihó, tin mas energia i un mihó aparensha, no tin un remedi mas mihó ku hasi ehersisio. Nunka no ta lat pa kuminsá. I no ta importá si bo ta hende hòmber òf muhé, ni kuantu aña bo tin, ni e kondishon físiko ku bo tin aktualmente.
Nos ke duna algun di e benefisionan di hasi ehersisio i pa mantené bo aktivo, i spera ku esaki lo ta e promé paso pa kuminsá ku bo mes programa regular di ehersisio.
Ehersisio ta redusí e chèns di muri na un edat yòn i di desaroyá òf muri di enfermedat di kurason i di preshon haltu. Tambe ehersisio ta yuda baha kolesteròl i e chèns di desaroyá kanser di tripa òf di pechu.
Banda di ta hopi importante pa baha e chèns di haña diabétis (suku haltu), ehersisio tambe ta yuda bo baha peso i vèt i ta hisa e nivel di bon kolesteròl den bo kurpa. Un punto importante ta ku emoshonalmente, ehersisio ta redusí e chèns di haña depreshon i nervio , e ta yuda bo bienestar general i drecha kon bo ta funshoná na trabou i den bo aktividatnan social.
Ehersisio manera landa I kore baiskel òf hisamentu di peso por oumentá bo forsa muskular. Entre otro e ta drecha bo funshon kardiovaskular, bo manera di hala rosea, hisa bo konsumo di oksígeno, drecha kon sanger ta kore den bo múskulonan i baha bo preshon di arteria. Ehersisio ta mantené bo múskulonan salú. Bo fleksibilidat, forsa den bo múskulonan, i e forsa den bo nervionan lo mehorá.
Ta hopi importante pa mantené bo wesunan salu i prevení osteoporosis ( forsa den wesu ta baha), prevení osteoarthritis I dolónan den lomba parti abou. E síntomanan aki lo ta ménos si hasi ehersisio mas regular. Tin dia lo bo sinti kansá despues di un dia kompliká na trabou. Kanando òf bayendo gym esaki lo yuda bo sinti hopi mas mihó. Tin kímikonan den nos mente ku ta laga bo sinti mihó i mas kontentu despues di hasi ehersisio. E ta drecha bo estado di animo, bo auto-estima, bo konfiansa i e por hasta prevení depreshon.
Nos tur sa ku ehersisio ta pone ku bo ta kima kaloria i mas intenso e ta, mas mihó. Pero tambe tin maneranan fásil di kima e kalorianan, dor di por ehèmpel hasi uso di trapi na lugá di left, dor di kana rònt riba kaya i hasi ménos uso di outo. Pues tur sorto di ehersisio ta bon i ta yuda bo mantené bo peso ideal. Tambe ehersisio ta yudabo drumi mihó, asina bo por bai un soño mas profundo ku lo permití bo tin un mihó konsentrashon durante dia, oumentá bo produktividat i mehorá bo beis. I no lubidá ku ehersisio tambe ta drecha bo bida seksual, i ta redusí problemanan di hende hòmber segun e añanan ta pasa. Ban spera ku despues ku bo lesa e artíkulo aki lo bo bai i hasi ehersisio. Kòrda bon ku ehersisio ta bo por disfrutá hopi di dje.