Awa empaketá
For di 1 mei 2013 e konsumidó no tin ku paga OB ora e kumpra bòter di awa. Komo ku gobièrnu ta konsiderá awa komo un produkto di promé nesesidat, a opta pa eksonerá awa empaketá di OB. Esaki ta konta pa tantu awa mineral, awa di fuente komo awa gaseoso.
Pan
Riba pan no tin ku paga OB. Riba merkado nos sa ku diferente sorto di pan ta wòrdu produsí i esaki por trese algun konfushon pa konsumidó. Kasi tur tipo di pan, entre otro ban blanku, pan brùin, volkorenbrood, pan franses, speltbrood, stokbrood, baguette, ciabatta, pan dushi, croissant i bégel ta kai bou di e eksonerashon aki. Otro produktonan manera buskuchi, pan di Pasku, saucijzenbrood òf pan drechá ku belèg si no ta kai bou di eksonerashon di OB.
Webu
Riba webu tampoko no tin ku paga OB. Esaki ta konta pa
tur webu ku ta adekuá pa konsumo humano.
Aros
Riba aros e konsumidó no tin ku paga OB. Tur tipo di aros ku ta adekuá pa konsumo humano, pues pa hende kome, ta kai bou de eksonerashon di OB.
Batata
Batata tambe ta eksonerá for di OB. E eksonerashon ta konta pa tur sorto di batata ku ta adekuá pa konsumo humano.
Grano
Den e lista di produktonan riba ku no tin ku paga OB, tambe nos ta haña grano. Bou di grano, nos tin ku komprondé entre otro spelt, puspas (gerst) , avena (haver), maishi chikí (gierst), maishi (mais), ròge(rogge) i trigo (tarwe). Grano produsí pa konsumo di bestia no ta kai bou di e eksonerashon di OB.
Hariña
Hariña tambe ta un di e produktonan riba kua e konsumidó no tin ku paga OB. Hariña ta un produkto ku ta wòrdu produsí generalmente dor di mula grano. Tin diferente sorto di hariña manera hariña di trigo, hariña di pan òf hariña di funchi. E produktonan aki ta eksonerá di OB.
Kuminda pa beibi
Kuminda pa baby tambe ta un produkto riba kua no
tin ku paga OB. E kuminda mester ta kuminda spesífiko pa beibi, por ehèmpel pòchinan ku kuminda di beibi ku smak di fruta òf kuminda kla prepará pa beibi. Bo mester por mira na e produkto ku ta un produkto pa beibi e ta.
Fruta i bèrdura fresku
E último kategoria di produkto ku for di dia 1 di mei 2013 ta eksonerá di OB ta fruta i bèrdura fresku. E eksonerashon aki ta konta pa tur sorto di bèrdura, por ehèmpel kròpsla, tomati, awakati, pampuna, siboyo i bonchi i tambe tur fruta, manera patia, apelsina, mango, anasa, kiwi i lamunchi. Fruta i bèrdura ku ta bini sea den bleki, pòchi òf di vris, no ta kai bou di e eksonerashon aki. Riba esakinan si e konsumidó tin ku paga OB.