Si e tin sospecho di ku bo a hòrta òf keda sin paga algun produkto, e por pidibo pa listra den bo kosnan. Abo por ninga esaki. Si e kontroladó tin sospecho fuerte e por disidí di detené bo te ora polis yega pa por hasi e kòntròl. Esaki den práktika ta trese kuné ku abo ta pèrdè bo tempu wardando yegada di polis i tambe ku hendenan rondó di bo lo bai puntra nan mes si ta hòrta e persona aki a hòrta. I hopi di nos no lo pasa e molèster i lo tin bèrgwensa pa pasa den un situashon similar.
E mihó maneranan di atendé ku kòntròl indeseá di kontenido di bo tas i protehá bo privasidat ta pa, na promé lugá, semper ta konsiente di bo derechinan. Un komersiante por laga pidi kontrolá bo tas solamente si e anunsiá esaki adelantá via bòrchi na entrada di e negoshi. Si e no anunsiá esei e no tin derechi pa kontrolá bo tas sin mas. E por pidi bo pa kontrolá òf detené bo den kaso ku e tin fuerte sospecho di ladronisia. E desishon ei ta algu suphetivo ku e negoshi por tuma, ounke e lo mester demostrá si kiko ta su sospecho. E ora ei ta di warda polis yega ku si tin outoridat pa kontrolá bo tas.
Si e kòntròl ta bira molestoso pa bo komo konsumidó, e mihó konseho ta pa hasi bo kompra na un negoshi ku si no ta trata bo di antemano komo ladron i ta respetá bo privasidat. I dado kaso tòg bo ke gasta bon sèn den un negoshi ku no ta respetá bo derechinan pa por hasi e eskoho di papia ku gerensia di e negoshi indikando ku bo no ta di akuerdo ku e práktika den e negoshi.